Deputadu CNRT husu Governu tau atensaun ba Estrada diresaun postu Uatulari

DILI, 14 maiu 2024 (TATOLI)—Reprezentante povu iha uma-fukun Parlamentu Nasionál (PN), husu ezekutivu atu tau atensaun ba preokupasaun infraestrutura bázika.
Notísia Relevante: Reprezentante povu husu Governu tau atensaun ba infraestrutura bázika
Deputadu CNRT, Anacleto Freitas, foti preokupasaun kona-ba estrada diresaun ba postu administrativu Uatulari antigu husi mota Bebui-Afaloikai ba to’o Nonomalau-Iraler, Nahae, Babulo ne’ebé mak populasaun suku neen iha postu administrativu ne’e asesu ho kondisaun ne’ebé mak grave tebes difikulta ba transporte públiku hodi lori komunidade nia produtu lokál ba merkadu.
Estrada diresaun ne’e mós difikulta ambulánsia atu transporte pasiente sira ba sentru saúde Uatulari hodi halo atendimentu.
“Tinan 20-resin ona estrada ne’e ho kondisaun grave tebes, difikulta tebes ba movimentasaun. Ho nune’e, nu’udar reprezentante povu iha uma fukun Parlamentu husu ba ministériu relevante hodi tau tau atensaun,” nia hato’o iha uma-fukun Parlamentu Nasionál.
Deputadu CNRT, Gabriel Soares, kontinua husu atu tau atensaun ba estrada husi kruzamentu Laclubar tama ba Laclubar ne’ebé agora kondisaun ladi’ak.
Aléinde ne’e, nia hato’o preokupasaun kona-ba situasaun ponte mota Lamara ne’ebé atu fasilita movimentasaun munisípiu tolu ne’ebé pertense ba tasi-mane, hanoin ba ministériu kompetente atu halo atendimentu emerjénsia.
Deputadu CNRT Natalino dos Santos, levanta preokupasuan husi populasaun iha suku ida Lour, aldeia Somaknua iha knua ida-ne’e to’o ohin loron seidauk asesu eletridade, kondisaun estrada ladi’ak labele asesu ba no laiha eskola ba labarik sira atu bele eskola.
“Maibé, iha tinan 1992 iha eskola ida iha ne’eba maibé depois funu eskola ne’e taka tiha. Ohin loron iha aldeia Somaknua labele iha eskola no labarik sira tenke la’o kilómetru hitu mak ba eskola, tanba ne’e husu ba Governu atu tau atensaun ba ida-ne’e,” nia dehan.
Deputadu PD, Armando Lopes, hateten estrada ne’ebé akontese iha munisípiu Lautém iha semana rua tutuir malu udan nunka para no mota sai eviksaun ba estrada husi postu Lospalos ba postu Luro no Lore, ne’ebé populasaun sira hasoru presiza halo intervensaun lalais.
“Tanba durante movimentu transporte paradu hotu no ambulánsia ne’ebé loloos atu evákua husi fatin hirak ne’e paradu hotu no estudante sira ne’ebé hakur mota atu ba eskola paradu hotu,” nia dehan.
Aléinde ne’e, iha kapitál munisípiu Lautém rasik hahú hosi tinan 2016 to’o agora kondisaun estrada nafatin taka kuak sira ho rai mutin ne’ebé tempu udan nakonu ho tahu dodok.
Jornalista : Nelson de Sousa
Editór : Cancio Ximenes

