DILI, 14 maiu 2024 (TATOLI)—Ekipa konjunta ne’ebé lidera husi Sekretaria Estadu Asuntu Tomponímia no Orgaizasaun Urbana (SEATOU) hamoos bee dalan ka drainajen iha parte suku Caicoli, postu administrativu Vera Cruz, munisípiu Dili.
Atividade ne’e realiza desde sábadu no domingu semana kotuk to’o kontinua semana ne’e, ne’ebé tuir planu sei halo atividade hanesan husi aldeia 01 Centro da Unidade, aldeia 02 12 de Devino, 03 Sacoco, 04 foho rai-boot, to’o Balide de Baixo.
“Fatin sira ne’ebé tahu no foer nakonu ne’e, ita ho mákina kee sai hotu hodi bee la’o livre sai bá tasi hodi redús impaktu inundasaun ne’ebé akontese beibeik iha tempu udan no hodi evita risku ba komunidade ne’ebé hela iha área ne’e. Ho ida-ne’e, ohin ita iha Polísia Nasionál Timor-Leste (PNTL) to’o nia sorin hamoos valeta to’o kruzamentu Polísia Servisu Investigativu Kriminál atu normaliza bee halai tuir dalan bá tasi ibun,” Sekretáriu Estadu Asuntu Toponímia no Organizasaun Urbana, Germano Santa Brites Dias, hateten, iha Caicoli, tersa ne’e.
Notísia relevante : SEATOU hakarak transforma sidade iha territóriu sai moos no organizadu
Iha biban ne’e, nia agredese ba komunidade iha Caicoli no parte PNTL nia sorin, ne’ebé koopera hodi ajuda ekipa halo serbisu hamoos no hasai foer sira iha valeta laran.
Governante ne’e dehan, ekipa kontinua hala’o atividade ne’e to’o bee halai tuir valeta sira, hafoin ekipa haree fali fatin seluk.
“Husu ba Caicoli parte veteranu nian sa’e to’o Caicoli klaran ba liu to’o Cristal nian, komunidade ne’e taka valeta ka tau barraka iha valeta leten, tenke koopera ida-idak tenke kee bee dalan maibé la koopera mak mákina tun sei la salva barraka ka uma ne’ebé imi halo iha valeta leten. Husu mós ba komunidade suku Caicoli labele soe foer fali ba valeta laran, tenke kee rai kuak mak uza. Ba oin mak imi kontinua nafatin ha’u sei ko’alia ho kompañia sobu hotu, lae sei taka hotu imi-nia bee dalan halai mai valeta laran,” nia aviza.
Ekipa konjunta kompostu husi SEATOU, PNTL, FALINTIL-Forsa Defeza Timor-Leste (F-FDTL), Ministériu Obra Públika (MOP), Terra no Propriedade, Ekipa Jestaun Merkadu munisípiu Dili no seluk tan.
Husu operadór telekomunikasaun hadi’a fiu dezorganizadu
Biban ne’e, Sekretáriu Estadu Germano husu ba operadór telekomunikasaun sira hanesan Telemor, Telkomcel, Timor Telecom, ne’ebé hetan ona orientasaun iha fulan kotuk atu hadi’a sira-nia fiu dezorganizadu sira.
“Iha tempu badak ami sei bolu fali sira atu ko’alia tanba tempu ne’ebé ami fó sira hadi’a fiu ne’e fulan-ida, hahú iha loron 16 marsu to’o 16 abríl maibé agora liu ona fulan-ida maibé fiu balun kontinua sabraut, ita husu operadór telekomunikasaun sira tenke koopera hodi aselera serbisu,” nia hato’o.
Hafoin operadór telekomunikasaun sira halo enkontru ho ekipa iha fulan kotuk, sira rasik sei hadi’a sira-nia fiu maibé hafoin serbisu ne’e la’o sira menus iha rekursu-umanu no ekipamentu maibé iha tempu badak ekipa SEATOU sei bolu atu rona parte ida-ne’ebé mak seidauk hadi’a tenke aselera.
Fiu sira dezorganizadu iha estrada protokolu sira hahú husi Comoro tama bá Colmera to’o Cristo Rei, Balide to’o Taibesi.
“Bainhira la aselera mak ekipa SEATOU sei tun sobu tanba ami kontinua hala’o ami-nia serbisu, tanba ita hakarak organiza Dili sai organizadu no moos,” nia fó hanoin.
Jornalista : Arminda Fonseca
Editora : Julia Chatarina
