iklan

EKONOMIA, HEADLINE

Empreza Tsuneishi Shipbuilding atualiza progresu rejistu investimentu ba PM

Empreza Tsuneishi Shipbuilding atualiza progresu rejistu investimentu ba PM

Imajen/Media GPM

DILI, 14 maiu 2024 (TATOLI) – Embaixadór Japaun iha Timor-Leste, Tetsuya Kimura, akompaña reprezentante kompañia Japonés Tsuneishi Shipbuilding, hodi atualiza progressu rejistu legál no investimentu indústria konstrusaun navál iha Manatuto, ba Primeiru-Ministru (PM), Kay Rala Xanana Gusmão.

Durante hasoru malu, iha asuntu rua mak Tetsuya Kimura atualiza bá Primeiru-Ministru mak hanesan, progressu invetimentu hosi kompañia Tsuneishi Shipbuilding no mós projetu konstrusaun fíziku ne’ebé Japaun oferese liuliu instalasaun fasilidade foun iha Hospital Nasionál Guido Valadares (HNGV).

“Prezidente Tsuneishi Shipbuilding mai hamutuk ho ha’u hodi atualiza bá Primeiru-Ministru kona-bá dezenvolvimentu hosi sira-nia servisu. Kompañia ne’e mós harii ona sira-nia kompañia lokál iha Timor-Leste,” Embaixadór Japaun hateten, hafoin enkontru iha palásiu Governu, tersa.

Iha fulan janeiru tinan ne’e, kompañia rekruta ona funsionáriu lokál na’in-rua no fasilita ona bá tuir treinamentu iha Japaun, inklui rekruta ona ema na’in-20 hanesan dezeñadór ró nian no bainhira finaliza sira-nia estudu hosi Universidade Nasionál Timor Lorosa’e (UNTL) sei servisu bá kompañia ne’e.

Kompañia ne’e rejistadu iha Servisu Rejistu no Verifikasaun Emprezariál (SERVE) no sei kompleta rekezitu sira seluk tán, kontinua halo estudu viabilidade atu bele konklui akordu hodi hetan sertifikadu lisensa ambientál, nune’e bele hahú konstrusaun.

Daudaun iha ona timoroan lubuk ida mak servisu iha Japaun hanesan Technical Intern Training (TIT) iha Kochi Prefecture no foin lalais Sekretáriu Estadu Formasaun Profisionál no Empregu (SEFOPE) vizita ona Japaun hodi asina Memorandum Entendimentu ho Tsukuba city.

Tetsuya Kimura mós atualiza ba Primeiru-Ministru kona-bá projetu dezenvolvimentu asisténsia saúde ne’ebé oferese hosi Japaun, liu-liu projetu instalasaun fasilidade foun iha HNGV no Xefe Governu rasik vizita ona iha semana kotuk.

Notísia relevante: Dewi Fortuna hasoru PM Xanana ko’alia amizade TL-Indonézia

Jornalista: Hortencio Sanchez

Editór: Florencio Miranda Ximenes

iklan
iklan

Leave a Reply

iklan
error: Content is protected !!