DILI, 14 maiu 2024 (TATOLI) – Ekipa Coach Eleven provizóriu lidera grupu C ho pontu neen, hafoin manán adversáriu klube futeból Fitun Ramelau FC ho rezultadu 3-2 iha kopa Maun Boot Kay Rala Xanana Gusmão, iha Estádiu Munisipál Dili, tersa lokoraik ne’e.
Tanba ne’e klube ne’ebé tu’ur iha liga segundu grupu C mak hanesan, Fitun Ramelau FC ho pontu tolu, terseiru Naimeco FC ho pontu zero no ikus liu Sousa FC ho pontu zero.
Jogu entre ekipa rua ne’e hahú jogadór sira lansa kedan kontra no atake ba malu ho ritmu ne’ebé makas. Maibé Eleven domina liu bola hodi halo presaun makas ba Ramelau.
Eleven hala’o jogu modelu ofensivu akompaña mós ho defensizu bainhira Ramelau halo atake ne’ebé maka’as. Ramelau hatudu jogu ne’ebé kalma no la ansi halo golu, ho maneira jogu ne’ebé Ramelau halo fó biban kedan ba Eleven halo presaun maka’as no jogu foin la’o to’o minutu 3, jogadór Rofino Gama (20), lansa ona golu dahuluk hodi muda rezultadu ba 1-0.
Golu ne’e hasa’e liutan vontade Eleven nian hodi hatudu jogu brillante iha kampo laran, Eleven halo tiki-taka ba mai, duir bola husi ain ba ain halo Ramelau tenke servisu maka’as.
Maske servisu maka’as iha kampu laran la sai dezafiu ba Ramelau tanba ho pasiensia hodi hatudu jogu ne’ebé bonitu ba adeptu sira ne’ebé tuur iha tribun leten maske seidauk hatama golu.
Jogu la’o ho barullu, minutu la’o ho kalma maibé jogadór sira lansa atake ba malu to’o minutu primeira parte nian termina laiha tan golu ruma mak akontese vitoria provijoriu hela ba ba Eleven 1-0.
Hakur ba segunda parte Eleven hatudu jogu ne’ebé extraordinariu maibé sutu barak mak falla husu João Pedro no sutu barak mós guarda rede Ramelau baku sai no balu mós la kona iha alvu.
Jogadór mediu Ramelau la nonok de’it nafatin halo servisu makas hamutuk ho nia kolega sira iha kampo laran, fó bola baraka ba avansadu maibé la konsege ezekuta ho di’ak la rezulta golu. Maske seidauk hatudu golu ruma Ramelau nafatin iha vontade bo’ot tenta atu domina kampo husi Eleven.
Maibé Eleven la fó ulun, sira mós hamrik metin ho ain-rasik. Hatudu jogu profesionál nune’e iha minutu 59, jogadór Carlos Ximenes (16), prodús tan golu ida muda rezultadu ba 2-0, golu ne’e halo jogadór no ofisiál klube kontente no hakilar ho lian maka’as hodi provoka Ramelau maibé Ramelau kontinua nonok hodi hala’o nafatin jogu.
Eleven forsa liutan, loke liras iha kampu laran hatudu sira mak makas tanba domina liu bola nune’e iha minutu 60, jogadór Expedito Conseição (10), lansa tan golu ida hatur rezultadu ba 3-0.
Golu ne’e halo Eleven loko-aan makas no lakohi ona antisipa ho di’ak. Maibé Ramelau nonok hatudu jogu brillante buka meiu hotu atu responde netik golu ruma atu labele fila ho zero alias mantolun.
Esforsu ne’ebé Ramelau halo la hela de’it hanesan esforsu tanba iha minutu 66 jogadór Jeramias da Silva (6) responde golu ida muda rezultadu ba 3-1, golu ne’e halo treinadór Ramelau haksoit aas no kontente hodi hakilar “importante hatama golu, ami la fila ho zero”.
Golu ne’e halo Eleven trauma nune’e halo defensivu ne’eb’e makas, amibé defensivu ne’ebé eleven halo la konsege metin iha minutu 76 jogadór estranjeiru Daniel Apiah (3) prodús tan golu ida hodi muda rezultadu rabat ba Eleven ho eskore 3-2.
Jogadór Ramelau haka’as aan makas liu iha minutu ikus ne’e maibé tanba Eleven taka maka’as iha lina kotuk Ramelau tenke hela de’it ho golu rua ne’e to minutu termina vitoria nafatin hela ba Eleven tanba hatama golu boot liu duke Ramelau.
Maske lakon maibé Ramelau sei iha pozisaun ne’ebé hakmatek iha tabela grupu nian hodi hein fali jogu ikus ne’ebé sei kontra Sousa FC.
Jogu ne’e dirije husi árbitru prinsipál Fernando da Costa, juiz liña António Carvalho, Henrique Pereira no árbitru rezerva Pedro Braga.
Notísia relevante: Manán Relay 3-0, Zhavia provizóriu lidera grupu A iha kopa Xanana
Jornalista: Hortencio Sanchez
Editór: Florencio Miranda Ximenes
