DILI, 14 maiu 2024 (TATOLI)–Ministériu Edukasaun (ME) hahú halo ona kolokasaun profesór hamutuk 480 ba eskola 276 iha territóriu tomak.
“Husi totál kandidatu klasifikadu 491, rezigna-an na’in-haat, la submete dokumentu na’in-neen, diploma laiha na’in-ida. Hafoin ami halo notifikasaun, na’in-480 mak submete dokumentu no prontu hetan ba kolokasaun hanorin iha estabelesimentu edukasaun ka eskola sira iha territóriu tomak,” Sekretáriu Estadu Ensinu Sekundáriu Jerál no Ensinu Tékniku Vokasionál, Domingos Lemos Lopes, informa, hafoin fo pose ba profesór 48 iha salau Ian Martin INFORDEPE, Balide, tersa ne’e.
Prinsípiu kolokasaun tuir nesesidade manorin, ho baze ba kuadru pesoál ne’ebé ME estabelese, konforme regra rekrutamentu atu ingresa iha karreira dosente tuir Diploma Ministeriál númeru 81/2023.
“Ita kongratula emposadu manorin foun sira hamutuk 480, ne’ebé ita koloka ba estabelesimentu edukasaun sira ne’ebé ho kondisaun krítiku ka presiza tebes manorin. Aseitasaun no pose períudu dahuluk ne’e, ita halo uluk ba estabelesimentu eskola hirak ne’ebé Ministériu Edukasaun konfirma ninia nesesidade krítiku,” nia akresenta.
Notísia relevante : KM autoriza loke teste bolsa kandidatu faze daruak
Nune’e, Sekretáriu Estadu husu ba emposadu atu hala’o knaar ho didiak, nune’e bele atinje kualidade edukasaun iha Timor-Leste.
“Ba iha teste eletrónika bolsa kandidatu ne’e ami asegura transparénsia no kualidade iha prosesu teste, ne’ebe habiban partisipante bele haree kedas sira-nia valór teste,” nia hato’o.
Ba programa bolsa kandidatu faze dahuluk, ME determina grupu rekrutamentu ka área ensinu hamutuk sia nomós determina kedas ho totál vaga ba kada grupu rekrutamentu.
Bolsa kandidatu iha faze ne’e prepara vaga hamutuk 2.400, ne’ebé fahe ba grupu rekrutamentu ka área ensinu ida-idak, maibe la atinje kandidatu klasifikadu tuir totál vaga determinadu.
Prezidente Komisaun Funsaun Públika (KFP), Agostinho Letêncio, hateten, IX Governu Konstituisionál nia planu polítika reforma ne’e hodi atinje kualidade edukasaun iha Timor-Leste.
“Husi kandidatu profesór 13.021 maibé profesór 500-resin mak pasa ne’e hatudu iha duni kualidade. Tanba ne’e iha IX Governu konstituisionaá halo reforma,” nia louva.
Emposadu, Abel Soares Martins, deklara, bainhira ME koloka ba eskola sira iha área rurál, hanesan manorin tenke prontu kumpre orden.
“Tanba iha ami-nia kompromisu, ami kompromete ona katak tenke leál ba Estadu. Tanba ne’e, hanesan servidór prontu atu ezekuta de’it orden ne’ebé mak Ministériu Edukasaun sei aplika. Karik atu koloka ba hanorin iha eskola sira iha aérea rurál hanesan timoroan prontu atu serví timoroan,” nia dehan.
Nune’e mós, Emposadu, Abel Soares Martins, hanorin disiplina matemátika iha eskola CAFE Ermera, ne’ebé hasai lisensiadu matemátika iha Universidade Nasionál Timor-Lorosa’e (UNTL) iha tinan 2018.
Profesór hamutuk 480 kompostu husi munisípiu Aileu 30, feto 19 mane 11 ba eskola 26, Ainaro totál 39, feto 26 mane 13 ba eskola 16, Baucau totál 50 feto 36 mane 14 ba eskola 24, Bobonaro totál 67 feto 38 mane 29 ba eskola 43, Covalima totál 13 feto 11 mane 2 ba eskola 12, Dili totál 23 feto 19 mane 4 be eskola 13, Ermera totál 68 feto 45 mane 23 ba eskola 31, Lautem 22 feto 15 mane 7 ba eskola 12, Liquiçá totál 13 feto 7 mane 6 ba eskola 28, Manatuto totál 29 feto 16 mane 13 ba eskola 26, Manufahi totál 21 feto 10 mane 11 ba eskola 15, RAEOA totál 31 feto 12 mane 19 ba eskola 14, Viqueque totál 40 feto 18 mane 22 ba eskola 16.
Jornalista : Osória Marques
Editora : Julia Chatarina
