DILI, 14 maiu 2024 (TATOLI)–Governu liuhusi Ministériu Transporte no Komunikasaun (MTK), tersa ne’e, fó pose ba membru Konsellu Administrasaun Autoridade Portuáriu Timor-Leste, Institutu Públiku (APORTIL, I.P) ba períodu tinan-tolu (2024 to’o 2027).
Membru Konsellu Administrasaun APORTIL, I.P emposadu kompostu husi Prezidente José de Oliveira Leong, Vogal I Julio Saldanha Barreto no Vogál II Leandro de Sena.
Iha tomada pose ne’e, emposadu halo juramentu ba Maromak katak, ho sira-nia onra, sei obedese leál ba instituisaun Governu no Estadu iha sira-nia serbisu tomak hodi la’o tuir lei no regulamentu ne’ebé vigór hodi tau a’as interrese programa Governu tuir valór funsaun públika no seluk tan.
Prezidente APORTIL,I.P, Feliciano da Costa Correia, agradese ba VIII Governu ne’ebé fó konfiansa ba nia ho vogál na’in-rua hodi lidera instituisaun to’o IX Governu, durante fulan-10 to’o ohin loron to’o hetan nomeasaun.
“Serbisu importante sira ne’ebé konsellu emposadu sira presiza kontinua maka halo ajustamentu ba ita-nia planu asaun anuál dezenvolvimentu Portu Dili tuir planu mestre ne’ebé ita-nia parseiru JICA finaliza ona, futuru haree ba nia jestaun presiza tebes hodi mellora servisu administrasaun no jestaun portuáriu Timor-Leste nomós marrítima,” Feliciano da Costa, hato’o liuhusi nia diskursu iha salaun MTK, Caicoli.
Notísia relevante : APORTIL iha koñesimentu ba ró rua ne’ebé atraka iha portu Dili
Nia dehan, membru sesante prontu kontinua apoia membru emposadu iha kualker tempu, nune’e bainhira iha ona publikasaun kona-ba desizaun nomeasaun konsellu foun, téknikamente hahú husi fulan-abríl to’o maiu, parte rua halo koordenasaun no komunikasaun serbisu atu asegura serbisu sira-ne’ebé la’o hela.
“Ami halo uluk ona hand over iha fulan-abríl, nune’e husu ba konsellu emposadu sira atu kontinua serbisu tuir planu no programa ne’ebé iha,” nia hameno.
Iha biban hanesan, Prezidente emposadu APORTIL, I.P José de Oliveira Leong, komprometidu sei kontinua serbisu tuir planu no programa sira ne’ebé iha.
Ministru Transporte no Telekomunikasaun, Miguel Manetelo, hateten, prosesu entrega poder ba malu ida-ne’e hanesan prosesu normál iha vida organizasaun, maibé buat importante nu’udar timoroan mak jestu ne’ebé parte rua hatudu ona, katak serbisu koopera malu halo hand over to’o ohin loron.
“Ha’u agradese ba ekipa sesante no ekipa emposadu. Relatóriu ne’ebé konsellu foun simu ona, serbisu balun husi ekipa sesante, ekipa foun presiza kontinua halo hodi bele hadi’a serbisu portuáriu nian,” nia dehan.
Vise-Primeiru Ministru, Ministru Koordenadór Asuntu Ekonómiku no Ministru Turismu no Ambiente, Francisco Kalbuady Lay, husu konsellu foun ne’ebé ne’ebé hetan ona fiar husi Governu atu kontinua serví povu ho di’ak.
“APORTIL hala’o papél importante ba ekonómiku nasaun iha tasi no serbisu portu, la’ós de’it atu fasilita movimentu sasán, maibé promove kresimentu ekonomiku. APORTIL, I.P la’ós de’it autónomu maibé haree mós ita-nia vizaun ba futuru jestaun portu iha Timor-Leste,” nia dehan.
Nia konsidera, ámbitu ne’e reprezenta Timor-Leste nia kompromisu atu uza portu sira atu promove ekonomia ba oin no asegura kresimentu inkluzivu ba sidadaun.
“Liuhusi APORTIL, ita sei foka liuba modernizasaun infraestrutura portu nian, hamenus prosesu ba administrativu sira no hasa’e konetividade ho merkadu globál sira, ita sei to’o prioridade investimentu sira-ne’ebé iha teknolojia dezenvolvimentu kapitál umanu hodi asegura ita-nia portu iha ekipamentu atu responde ba nesesidade husi ekonomia sekulu agora,” Kalbuadi, tenik.
Serimónia ne’e partisipa husi membru Governu, deputadu husi Parlamentu Nasionál, Komisaun Funsaun Públika inklui entidade relevante seluk.
Jornalista : Arminda Fonseca
Editora : Julia Chatarina
