DILI, 14 maiu 2024 (TATOLI)–Sekretaria Estadu Formasaun Profisionál no Empregu (SEFOPE), tersa ne’e, lansa formasaun emprendedorizmu ba traballadór timor-oan 56 ne’ebe bá serbisu iha Austrália no Koreia Súl, bainhira fila ona mai Timor-Leste.
“Programa re-integrasaun ida-ne’e importante tebes ba traballadór timor-oan sira ne’ebé bá serbisu iha rai-li’ur tanba bainhira fila mai ona la hatene jere osan, maibé liuhusi formasaun ne’e bele fasilita sira halo jestaun ba sira-nia osan bainhira halo negósiu ruma,” Sekretáriu Estadu Formasaun Profisionál no Empregu, Rogério Araújo Mendonça, informa iha Hotel Timor.
Notísia relevante : SEFOPE no parseiru realiza programa re-integrasaun traballadór timor-oan
Nia dehan, traballadór sira ne’ebé atu hetan formasaun ne’e tenke rejista iha Departamentu Re-ingrasaun hodi hetan oportunidade formasaun emprendedorizmu husi Institutu Apoiu Dezenvolvimentu Emprezariál liuhusi programa Youth Enterpreneurship and Employment Support Service (YEES).
Iha biban hanesan, Prezidente IADE, Filomeno Marcelino Babo, informa, daudaun númeru traballadór ne’ebé fila ona mai Timor-Leste no rejista ona iha SEFOPE hodi prontu tuir formasaun empreendedorizmu ne’e hamutuk 56.
Formasaun ne’e hala’o durante loron-tolu hahú hodi loron 15-17 maiu 2024, ne’ebé sei hala’o iha ETDA ho tema: ‘Open Ideia Negósiu’.
“Ita sei halo esforsu másimu iha formasaun ne’e atu fasilita ita-nia joven sira bele hatene oinsá sira rasik bele jere sira-nia osan iha atividade negósiu,” nia akresenta.
Iha fatin hanesan, Jerente Projetu YEES husi Programa Nasaun Unida ba Dezenvolvimentu (PNUD), Hunjai Lee, hateten, formasaun empreendedorizmu ne’e nesesáriu tebes atu aumenta joven sira-nia abilidade hodi dezenvolve ideia negósiu ba empreza rasik.
“Ita kontinua apoiu Governu Timor-Leste hodi halo esforsu ba diversifikasaun ekonomia Timor-Leste,” nia salienta.
Daudaun traballadór timor-oan hamutuk 15.000 mak fila ona mai Timor, kompostu husi Austrália 14.000 no Koreia Súl 1.000-resin.
Entidade ne’ebé kolabora no hola parte iha programa ne’e hamutuk ho SEFOPE mak hanesan Institutu Apoiu Dezenvolvimentu Emprezariál (IADE), PNUD, Ajéncia Koopersaun Internasionál da Koreia (KOICA, sigla portugés) liuhusi programa YEES, inklui apoiu husi Embaixada Austrália no Koreia Súl iha Timor-Leste.
Jornalista : Arminda Fonseca
Editora : Julia Chatarina
