DILI, 15 maiu 2024 (TATOLI) – Koordenadora Even2u, Maria Pinto, informa, Even2u sei lori artista internasionál, mai konserta iha portu Dili iha loron 19 maiu, ne’ebé hetan apoiu hosi setór privadu sira iha Timor-Leste.
“Konsertu Festivál Tasifest ne’e organiza hosi Even2u no suporta hosi setór privadu sira hanesan Banku Nasionál Utramarino (BNU), Timor Plaza, Aero Dili, Jack’s Timor Leste, Timor Telecom, Hotel Timor, Bintang, Dili medical Center (DMC), Caltech no seluktan”, Maria Pinto informa ba TATOLI bainhira hala’o entrevista eskluziva iha Edifísiu TATOLI.IP, Farol, ohin.
Maria dehan, kustu ne’ebé prepara ba artista Calema nia viajen ho orsamentu hamutuk rihun $250-resin.
“Kona-ba kustu ba viajen jeralmente orsamentu hamutuk rihun $250-resin, ida-ne’e atu ita lori de’it sira mai, inklui hela iha ne’e, han, hemu no prosesu halo sira-nia vídeo, tanba hamutuk ho Calema ema 17 mak mai. Entaun, ita haree ekipa boot mak viajen mai. Ita presiza kustu boot atu responde ba sira-nia nesesidade sira iha ne’e”, nia relata.
Nia esplika, Duo múziku Calema viajen ona mai Timor-Leste atu hala’o konsertu iha Portu Dili hodi selebra Festival Tasifest.
“Daudaun ne’e artista Calema viajen ona husi Portugal mai Timor-Leste hodi hala’o konsertu iha loron 19 maiu iha Portu Dili hodi selebra Festival Tasifest”.
Koordenadora Even2u, Maria Pinto haktuir katak dezafiu ne’ebé Even2u hasoru mak durante ne’e tenta Calema, maibé ninia oráriu nakonu maibé ikus mai konsege. Entaun, prosesu atu lobby artista internasionál ida-ne’e la fasil.
Koordenadora Maria Pinto dehan, aleinde artista Calema, Even2u konvida mós artista sira iha rai-laran atu promove mós sira-nia talentu ne’ebé mak sira iha.
“Artista rai-laran ita konvida Juju and friend, família alkatraz, DJ, Crimson no artista sira seluk ne’ebé sei performa hamutuk ho Calema iha 19 kalan iha Portu Dili”, nia esplika.
Maria Pinto konta, atu asesu ba konsertu ne’e, iha tipu billete tolu; ida ba billete regular ho nia presu $4, billete prémiu ho presu $10 no ida seluk mak billete VIP ho presu $150.
“Billete tipu tolu ne’e, ita prodús rihun-30, ema ne’ebé mak hakarak atu sosa bele sosa hodi asiste ba konsertu ida-ne’e”, nia konklui.
Notísia relevante : Artista Calema sei anima povu TL hodi selebra Festival Tasifest
Jornalista : Felicidade Ximenes
Editór : Zezito Silva
