VIQUEQUE, 15 maiu 2024 (TATOLI)-Autoridade munisípiu Viqueque prevee ona orsamentu hamutuk $289,686.85 hodi reabilita merkadu Olobai ne’ebé lokaliza iha suku Caraubalo, Postu Administrativu Viqueque Vila, munisípiu Viqueque.
Prezidente Autoridade munisípiu Viqueque, Francisco Cruz S.de G Soares, hateten kondisaun merkadu munisipál liuliu nia infraestrutura no fasilidade liuliu bee-moos ladun di’ak hodi fasilita negosiante sira fa’an produtu lokál.
“Ami-nia alvu dahuluk mak atu muda negosiante sira fa’an iha dalan ninin no iha merkadu Viqueque Vila ba fa’an hotu iha merkadu Olobai. Maibé ita atu muda ema (negosiante) husi fatin ida bá fatin seluk primeiru ita tenke kria kondisaun. Ne’e maka ita tenke hadi’a lai merkadu Olobai tanba se ita muda derepente entaun sira ba hela iha ne’ebé mak faan sira-nia produtu sira-ne’e”, dehan PAM Viqueque ne’e ba Agência Tatoli,I.P iha kna’ar fatin.
PAM mós planeia atu koordena ho xefe suku Caraubalu hodi negosia ho okupante sira iha merkadu Viqueque Vila atubele dezenvolve sai fatin Gináziu munisípiu Viqueque.
“Ita mós hakarak merkadu munisípiu Vqueque tenke iha fatin ida no organizadu, atu nune’e vizitór sira vizita atu sosa sasán ruma iha merkadu karik fatin moos no organizadu. Alende atrai vizitór sira tanba durante ne’e ita haree merkadu nakonu ho lixu, faan sasán la tuir regra”, nia relata.
Tuir planu reablitasaun ba merkadu Olobai iha tinan 2025 tanba tau ona ba programa perióridade munisípiu Viqueque no orsamentu tau ona.
“Tinan oin halo tiha reabilitasaun hotu, ami sei kria regra ida ba negosiante sira no negosiante hotu-hotu tenke ba fa’an hotu iha merkadu Olobai. Ita hotu tuir planu ordenamentu territória”, nia akresenta.
Hasai negosiante faan iha trotoár leten
Bazeia ba lei Kódigu Estrada hosi dekretu-lei numeru 06/2003 iha artigu 93 kona-ba trotoár fatin ba ema la’o ain, la’ós uza atu halo atividade negósiu.
Nune’e PNTL muda negosiante sira durante ne’e uza trotoár halo atividade negósiu ba fali iha merkadu tuan, lokaliza iha edifisiu Eletricidade de Timor-Leste, Empreza Publika (EDTL, E.P) ninia oin.
Antes ne’e Diresaun Jestaun Merkadu no Turizmu Munisípiu Viqueque rejista negosiante sira-ne’ebé fa’an sasán iha merkadu EDTL,E.P ninia oin purvolta 140.
Notísia relevane: Autoridade Baucau prepara ona kondisaun hodi konstrui merkadu munisipal
Jornalista :Vitorino Lopes da Costa
Editór : Florencio Miranda Ximenes
