iklan

EDUKASAUN, HEADLINE

ME planeia fasilita formasaun área haat ba profesór 50-resin husi ESTV

ME planeia fasilita formasaun área haat ba profesór 50-resin husi ESTV

Eskola Ensinu Sekundáriu Tékniku Vokasionál, Becora. Imajen/Tatoli

DILI, 15 maiu 2024 (TATOLI)—Ministériu Edukasaun (ME) planeia ona atu fasilita formasaun iha área haat ba profesór 50-resin husi Ensinu Sekundáriu Tékniku Vokasionál (ESTV).

“Ita iha polítika ida ko’alia kona-ba formasaun ba profesór sira, halai liu ba programa produtivu. Oras ne’e daudaun Ministériu Edukasaun iha ona planu ba Ensinu Sekundáriu Tékniku Vokasionál. Durante ne’e ita iha problema boot ba área produtivu, nune’e profesór 50-resin tuir formasaun iha fulan-agustu,” Diretór Nasionál Ensinu Sekundáriu Tékniku Vokasionál, Fernando Mouzinho informa iha ninia knaar fatin, Vila Verde, kuarta ne’e.

Notísia relevante : ESTV barak menus profesór produtivu no ekipamentu prátika

Formasaun ne’e halai liubá área hanesan agrikultura, informátika, konstrusaun sivíl no eletresidade.

“Ida-ne’e planu ba 2024 nian no halo kooperasaun ho Governu Brazíl. Ida-ne’e sei liuhusi Institutu Nasionál Formasaun Dosente no Profisionál Edukasaun Timor-Leste (INFORDEPE). Durante ne’e ita serbisu hamutuk ho INDIMO hodi elabora matéria saida mak sei utiliza ba iha formasaun tanba ita iha difikuldade ba profesór produtivu. Programa ida-ne’e sei kontinua ba profesór produtivu iha tinan 2025,” nia akresenta.

Iha sorin seluk, Prezidente INFORDEPE, Domingos Martins, hateten, eskola ne’ebé identifika hanesan iha Covalima mak Akar-laran, Cristal, ida iha Zumalai, no iha Fohorem, iha munisípiu Ermera ida iha Railaco no ida iha Gleno hanesan mós iha Baucau no Dili.

Jornalista     : Osória Marques

Editora          : Julia Chatarina

iklan
iklan

Leave a Reply

iklan
error: Content is protected !!