DILI, 15 maiu 2024 (TATOLI)—Ministériu Edukasaun (ME), iha tinan ne’e, simu ona pedidu 18 ba reabilitasaun eskola ne’ebé hetan estagu husi dezastre naturál (udan no anin) iha munisípiu lima hanesan Ainaro, Baucau, Bobonaro, Liquiçá, no Manufahi.
“Husi númeru ne’e, eskola ida mak ita halo ona distribuisaun materiál hanesan pregu, ai no kalen,” Direitór Nasionál Edukasaun Inkluzivu Asaun Eskolár, Fernando Soares, informa ba Agência Tatoli, iha ninia knaar fatin, Vila Verde, kuarta ne’e.
Notísia relevante : ME prevee millaun $3 ba kontsrusaun-reabilitasaun eskola iha territóriu
Eskola ne’ebé hetan estragu ne’e maka Pre-Eskolár Baura iha postu Bazartete, munisípiu Liquiçá, ne’ebé daudaun ne’e iha faze konstrusaun nia-laran.
“Eskola 17 ne’ebé daudaun ne’e iha faze verifikasaun nia-laran mak eskola báziku hamutuk 16 no pre-eskolár ida. Husi númeru ne’e, munisípiu Baucau mak barak liu, Ainaro iha haat, pre-eskolár ida no ensinu báziku tolu, Manufahi tolu no Viqueque tolu,” nia informa.
Tinan kotuk iha pedidu hamutuk ualu, ne’ebé halo ona distribuisaun materiál konstrusaun ba eskola sira iha tinan ne’e.
“Hein ekipa ba fali halo monitorizasaun hodi hatene katak konstrusaun la’o ona ka seidauk no materiál to’o ona ka seidauk. Ida-ne’e ita presiza halo, nune’e bele hatene nia progresu,” nia tenik.
Eskola ualu ne’e kompostu husi eskola ensinu báziku hitu no pre-eskolár ida iha munisípiu Manufahi no Bobonaro.
Jornalista : Osória Marques
Editora : Julia Chatarina
