iklan

EDUKASAUN

ME prevee millaun $3 ba kontsrusaun-reabilitasaun eskola iha territóriu

ME prevee millaun $3 ba kontsrusaun-reabilitasaun eskola iha territóriu

Konstrusaun sala-de-aula ualu (8) iha Eskola Ensinu Sekundáriu Jerál Públiku 5 de Maio Becora atinje ona 50%. Imajen Tatoli/Osória Marques.

DILI, 19 fevereiru 2024 (TATOLI)Diretór Nasionál Infraestrutura Bázika iha Ministéiru Edukasaun (ME), Hélio Lopes, hateten katak ME prevee miliaun $3 ba konstrusaun no reabilitasaun eskola iha teritórriu hamutuk projetu 20.

“Alokasaun ida-ne’e la’ós ona ba projetu komunitáriu maibé liuhusi prosesu aprovizionamentu ne’ebe sei jere husi kontratór ka kompañia sira-ne’ebé tuir konkursu. Dadaun ne’e faze verifikasaun dokumentu tékniku no fulan-marsu bele ona iha konkursu publiku ba projetu foun 20. Projetu ne’e ita sei realiza iha tinan ida-ne’e”, nia dehan Agência Tatoli, hafoin ba partisipa lansamentu projetu apoiu emerjénsia ba labarik no hatán ba COVID-19 iha TL, iha kampaun UN, Caicoli, Dili, segunda ne’e.

Hosi projetu 20 ne’e, nia dehan Pre-eskolár 11, ensinu báziku iha 9 no sekundáriu tékniku vokasionál iha rua (2). Reabilitasaun ba Eskola tékniku vokasionál Totik. Ida-ne’e rehabilita dormitóriu ba estudante sira, sintina públiku no sira-nia refetóriu.

“Ami iha tiha ona relatóriu lubuk boot ida, hein atu halo desizaun iha fulan marsu 2024 ne’e, desizaun final iha ona,” nia dehan.

Projetu konstrusaun ba eskola sira iha teritórriu ba tinan 2021 nian atinje ona 75% no hela 25% mak seidauk konklui.

“Ita iha projetu konstrusaun infraestrutura edukativu liuliu ba eskola hahú hosi projetu tinan orsamentu 2021. Ba tinan 2021 ne’e projetu kuaze 230-resin no daudaun ne’e 75%, finál ona no uza ona balun mak seidauk ramata. Hosi projetu ne’e iha besik 10 mak halo reabilitasaun,” nia hateten.

Projetu ba tinan 2021 nian iha Dili rasik maiória finaliza ona maibé ba munisípiu sira hanesan Aileu, Baucau, Liquiça, Manatuto no barak mak finaliza ona no balun seidauk finaliza maibé iha tempu badak sei finaliza hotu.

“Nia orsamentu millaun $20 ba alokasaun projetu konstrusaun no reabilitasaun eskola,” nia dehan.

Ba tinan 2023 iha hela faze implementasaun liuliu ba projetu komunitáriu no implematasaun hirak-ne’e tarde tanba iha kondisaun balun ne’ebe liga ba kestaun tékniku ho kestaun jeografika nune’e mós kestaun asesu estrada.

“Tanba ne’e halo tarde projetu hirak ne’e, maibé iha balun konsege finaliza ona. Ita hein katak iha tinan ida-ne’e nia rohan projetu lubuk ida-ne’e bele finaliza,” nia dehan.

Ba projetu komunitáriu tinan 2023, ME aloka miliaun $10-resin ne’e ba projetu 116, no nia implementasaun to’o ona 30%.

Aleinde ne’e, nia hateten, Eskola Ensinu Tékniku Vokasionál Hera iha ona indikasaun no sei hapara, nune’e mós iha projetu balun ne’ebé iha hela faze analiza hodi halo desizaun.

Entretantu, kona-ba Eskola Ensinu Sekundáriu Jerál públiku 5 de Maio Becora, tama hotu kategória maibé la’ós atu hapara.

“Ita sei haree nia efetividade ezekusaun ne’e to’o iha ne’ebé. No, iha konstrusaun balun ne’ebé bele estende to’o dala-tolu (3). Ida-ne’e bele hela no laiha problema. Agora eskola Fatuhada ita sei haree hahú hosi nia estimasaun sira maibé to’o termina estensaun tuir kontratu ne’e to’o fulan-setembru oin mai. Karik nia la konsege konklui ministériu bele hola desizaun mós,” nia dehan.

Kompañia sira-ne’ebé abandona prozetu sei hapara tanba prezudika ba estudante sira-nia atividade prosesu aprendizajen no prezudika ba ME no Governu liuliu ba ezekusaun orsamentu, no abandona sira-nia responsabilidade ne’ebé tuir kontratu hateten.

Jornalista : Osória Marques

Editór        : Cancio Ximenes

iklan
iklan

Leave a Reply

iklan
error: Content is protected !!