COVALIMA, 15 Maiu 2024 (TATOLI) – Inspesaun-Jerál Jogu (IGJ) Ministériu Turizmu no Ambiente (MTA) divulga informasaun kona-ba rezolusaun Governu númeru 14/2024, 20 Marsu, kona-ba suspensaun temporariamente atividade jogu bola guling iha territóriu ba autoridade no orepadór jogu iha Covalima.
“Ita divulga informasaun oinsá ita atu tranzmite rezolusaun ba operadór jogu no autoridade Covalima, nune’e sira bele fahe tutan informasaun atu kontinua kumpre rezolusaun Governu kona-ba suspensaun jogu tradisionál bola guling iha territóriu”, Subinspetór -Jerál Jogu, Edmu Benjamin Coelho Lopes, hatete ohin.
Rezolusaun sobre suspensaun tuir alínea c husi artigu 115 Konstituisaun RDTL hateten atu suspende temporariamente atividade hotu jogu tradisionál ne’ebé hanaran bola guling, iha asaun fiskalizasaun husi Inspesaun-Jerál Jogu no Inspetór Jogu ne’ebé hetan apoiu husi Polísia Nasionál Timor-Leste (PNTL) no prosede ka halo revizaun ba lejizlasaun jogu hanesan Dekretu-lei númeru 6/2016, 20 Abríl.
Edmu Benjamin relembra katak Konsellu Ministru prova rezolusaun suspensaun temporariamente atividade jogu tradisionál bola guling iha 13 marsu 2024, maibé iha munisípiu kontinua loke jogu bola guling iha mate-uma.
Tanba ne’e, IGJ hamutuk ho Polísia Sientífika Investigasaun Kriminál reforsa divulgasaun informasaun iha munisípiu 12, inklui Rejiaun Administrativa Espesiál Oé-Cusse Ambeno atu kumpre rezolusaun suspensaun provizóriamente hodi hein alterasaun dekretu-lei númeru 6/2016.
Atividade jogu iha territóriu regula ho dekretu-lei referidu kona-ba atividade jogu, tanba presiza atu halo revizaun ba regulamentu jogu atividade diversaun jogu tradisionál iha territóriu ne’ebé ho tipu hanesan toto bola online, lotaria, slot machine no jogu tradisionál hanesan bola guling, futu-manu no seluk tan.
Investigadór Polísia Sientífika Investigasaun Kriminál (PCIC), António Soares Ribeiro, bazeia ba rezolusaun Governu halo suspensaun jogu tradisionál, PCIC mós hola parte hodi ezekuta rezolusaun ne’e.
“Operadór ne’ebé loke jogu bainhira la tuir rezolusaun, ita foti medida hodi halo prosesu tuir lei vigora kona-ba esplorasaun jogu ilísitu. Ita submete prosesu ba Ministériu Públiku”, nia dehan.
Reprezentante Prezidente Autoridade Munisípiu Covalima, Caetano Ribeiro, reforsa katak sdivulgauna informasaun kona-ba suspensaun jogu tradisionál ne’e presiza duni.
“Nune’e ekipa nasionál divulga rezolusaun ne’e ba autoridade hotu bele entende, tanba realidade hatudu bainhira loke jogu bola guling hamosu konfrontu iha família, tanba uza osan ba hotu joga duké uza ba nesesidade família”, dehan.
Notísia relevante: PNTL Covalima orienta sidadaun suspende atividade jogu bola guling
Jornalista: Celestina Teles
Editora: Maria Auxiliadora
