DILI, 15 maiu 2024 (TATOLI)—Eleisaun órgaun suku ba segunda volta iha loron 13 maiu ne’ebé partisipa husi suku lima (husi suku 10), rezulta suku Lequitura iha munisípiu Aileu la hetan líder komunitáriu kualifikadu, tanba ne’e hakat ba eleisaun iha loron 18 maiu 2024.
“Ita hotu akompaña eleisaun segunda volta ba suku lima ne’e, prosesu hanesan baibain votasaun hahú tuku 09:00 dadeer to’o tuku 15:00 lorokraik, hahú kontajen votu termina iha tuku 18:30 rezultadu hatudu husi suku lima ne’e, suku haat hetan eleitu no suku Lequitura husi munisípiu Aileu mak hetan empata no hakat ba eleisaun suku iha loron 18 maiu 2024,” Diretór Jerál Sekretariadu Tékniku Administrasaun Eleitorál (STAE), Elviro Fernandes Moniz, informa ba Agência Tatoli, via telefónika, kuarta ne’e.
Konsellu suku mak deside data eleisaun tuir mai tanba tuir rezolusaun ne’e eleisaun to’o de’it segunda voltam tanba ne’e Ministériu Administrasaun Estatál no STAE falita de’it lojístika atu realiza re-eleisaun.
Ohin hahú imprime buletin votu no aban (16/05) sei distribui ba munisípiu Aileu hodi halo kedas pakotementu, nune’e iha sesta (17/05) lorokraik sei distribui ba aldeia haat iha suku lequitura,no sábadu (18/05) realiza votasaun, kontajen no halo kedas apuramentu.
“Buletin votu ba Lequitura nian ami print tan folla 500 de’it tanba restu bulletin votu 260 sei iha hela munisípiu Aileu, osan ne’ebé ita print ba buletin votu 500 ne’e hamutuk $250 tanba kada folla ida sentavu 50,” nia akresenta.
Notísia relevante : MAE-STAE entrega buletin votu eleisaun segunda volta ba suku lima
Suku lima ne’ebé tama iha segunda volta mak hanesan Manleuana kandidatu Jacob Tilman Soares eleitu ho votu 2.209 no Alexandre Soares Dias ho votu 1.730.
Suku Madohi, kandidatu Bernardino de Cristo Ferreira eleitu ho votu 2.551 no Dedi da Costa votu 1.927, suku Bebonuk, kandidatu Alfredo da Costa eleitu ho votu 1.754 no Serafin Masedo votu 1.391, suku Builo, kandidatu Hélio Ximenes de Ferreira eleitu ho votu 343 no Osório da Silva votu 173, enkuantu suku Lequitura mak Alarico Almeida Salsinha no Jose Almeida Salsinha empata.
Total eleitór iha suku lima ne’ebé tuir eleisaun iha segunda volta hamutuk 12.672 (46%) husi totál eleitór 27.636.
Jornalista : Arminda Fonseca
Editora : Julia Chatarina
