iklan

SOSIEDADE SIVĺL

CET realiza sinodu daruak haklaken “Komuñaun, Partisipasaun no Misaun”

CET realiza sinodu daruak haklaken “Komuñaun, Partisipasaun no Misaun”

Reitór UCT São João Paulo II, Joel Casimiro Pinto. Imajen TATOLI/Egas Cristóvão.

DILI, 16 maiu 2024 (TATOLI)–Konferénsia Episkopál Timorense (CET), kinta ne´e, realiza sinodu ba igreja sinodál daruak ho tema “Komuñaun, Partisipasaun no Misaun” iha salaun Nobel ba Paz iha Universidade Katólika Timorense (UCT, sigla portugés) iha Balide.

Notísia Relevante: Dom Virgílio do Carmo: “Leno uluk-aan, molok leno ema seluk”

Koordenadór Nasionál ba Sinodu Episkoparum Timor-Leste no atuál Reitór UCT São João Paulo II, Joel Casimiro Pinto.  OFM, hateten ohin akontese eventu boot ida iha igreja Timor nian sinodu bispu sira-nian.

Sinodu signifika la’o hamutuk, Jesus ho nia disipulu sira la’o hamutuk hodi fó hanorin no iha asaun evanjelizasaun forte.

“Igreja La’o iha tempu mordernu nian liuhusi Papa Francisco konvoka sinodu ida-ne’e kona-ba igreja sinodál ne’e rasik ho pilár tolu; komuñaun, partisipasaun no misaun. Ninia fundamentu mak batizmu komun husi sarani sira hotu hahú husi Papa Francisco, kardeál, bispu, saserdote no sarani kiik sira, liuhusi batizmu ida tama ona iha komuñaun ida iha Santisima Trindade,” Padre Joel Casimiro Pinto, OFM, hateten ba jornalista sira iha Balide.

Liuhusi batizmu nia forma ona Nai Maromak nia povu, Nain Maromak mak bolu nia tama iha komunidade ida-ne’e.

Pilar primeiru, komuñaun katak iha iha relasaun interdependénsia ba malu, laiha ema ida-ne’ebé la’o mesak de’it, tanba padre la halo desizaun mesak maibé nu’udar pastor la’o ho nia sarani sira, oinsá rona malu no ko’alia hamutuk.

Pilar partisipasaun ne’e konsiente ba sarani sira hotu sente ka la’e nu’udar sarani liuhusi batizmu. Dalabarak ema kestiona oinsá igreja nia partisipasaun, igreja mak sé, igreja mak ema-ne’ebé simu batizmu.

“Partisipasaun ativu la’ós de’it na’in-lulik no relijiozu no relijioza sira, maibé hotu-hotu atu feto ka mane, kiik ka boot, ita hotu hola parte iha asaun Maromak nian ne’e oinsá atu realiza ksolok iha mundu ne’e,” nia hateten.

Partisipasaun ativa lori ema hotu ba pilár terseiru kona-ba misaun mak ema hotu ne’ebé batizmu no sakramentu krisma iha maturidade fé.

“Ita iha responsabilidade boot atu haklaken misaun Maromak nian ba ema hotu. Ita fó testemuña sarani ida hanesan ema Timor,” nia dehan.

Iha fatin hanesan, Arsebispu Arkedioseze Metropolitana Dili, Dom Vírgilio Kardeál do Carmo da Silva, SDB, hateten sinodu ne’e enkontru ne’e reune saserdote, bispu no relijiozu no relijioza leigu no joven sira kona-ba kontribuisaun ba iha sinodu.

“Ita ohin iha Timor hamutuk dioseze tolu ne’e ho bispus, relijizo no relijioza, jovens no leigu sira atu ba kontribuisaun sira nian iha sinodu ne’e,” Dom Vírgilio Kardeál do Carmo da Silva, SDB, hateten.

Jornalista : Jesuína Xavier

Editór        : Cancio Ximenes

iklan
iklan

Leave a Reply

iklan
error: Content is protected !!