iklan

COVALIMA, HEADLINE

Diretór eskola no EJP partisipa formasaun kona-ba jestaun ba PME

Diretór eskola no EJP partisipa formasaun kona-ba jestaun ba PME

Ekipa Jestaun Programa partisipa formasaun sobre jestaun PME. Foto/Celestina Teles.

COVALIMA, 16 Maiu 2024 (TATOLI) – Servisu Edukasaun Covalima disponibiliza formasaun kona-ba jestaun ba implementasaun Programa Merenda Eskolár ba diretór eskola no ekipa jestaun programa (EJP) hamutuk na’in-23.

Prezidente Autoridade Munisípiu (PAM) Covalima, Miguel Armada Cardoso, dehan ekipa jestaun programa sei ezekuta osan tuir prosedimentu no lei ne’ebé hatuur no koordenadór no finansa EJP tenke serbisu hamutuk autoridade sira atu ezekuta osan presiza fó hanoin ba malu, nune’e bele jere ho di’ak.

Miguel Armada Cardoso fó hanoin ba inspetór sira presiza aprezenta relatóriu kona-ba programa ne’e atu Prezidente Autoridade bele hatene sira-nian serbisu.

Ba implementasaun programa merenda eskolár ne’e sei forma mós ekipa konjunta atu halo monitorizasaun no fó mós despaixu ba diretór ajénsia fiskalizaun atu halo mós observasaun ba implementasaun programa referidu ne’ebé jere husi EJP.

Merenda eskolár ne’e presiza fó ai-han ne’ebé haforsa, haburas ho proteína hodi kompleta malu no fó prióridade ba sosa produtu lokál iha postu administrativu sira no bandu sosa produtu importadu hanesan ayam potong no sosis.

Diretora Servisu Munisipál Edukasaun Covalima, Elda de Fátima, fó atensaun ba diretór eskola sira atu tau-matan, nune’e implementasaun programa merenda eskolár tuir menú indikativu ne’ebé mak define ona.

“Servisu Edukasaun sei halo monitorizaun ba implementasaun merenda eskolár ne’ebé jere husi ekipa jestaun programa ne’e fó han ba estudante tuir menú merenda eskolár ka la’e”, nia promete.

Programa Merenda Eskolár implementa iha eskola 148 ho totál alunu hamutuk 17.804, ne’ebé husi pré-eskolár iha 1.878 no ensinu báziku sentrál iha 16.026.

Alokasaun orsamentu ba merenda eskolár 2024 hamutuk millaun $1 ne’ebé kada estudante iha direitu han sentavu 0,42 hahú iha loron segunda to’o sesta.

Lembra katak oEdukasaun Munisípiu Covalima lansa, iha loron 13 Maiu, Programa Merenda Eskolár 2024 iha Eskola Bázika Sentrál Suai Loro.

Notísia relevante: Edukasaun Covalima lansa Programa Merenda Eskolár iha EBC Suai Loro

Jornalista: Celestina Teles

Editora:Maria Auxiliadora

iklan
iklan

Leave a Reply

iklan
error: Content is protected !!