DILI, 16 maiu 2024 (TATOLI)–Arsebispu Arkidioseze Metropolitana Dili, Dom Vírgilio Kardeal do Carmo da Silva, SDB, hateten komemorasaun loron restaurasaun independénsia ba dala-22 iha 20 maiu, konvida timoroan hotu hodi halo reflesaun no hanoin hikas ema sira-ne’ebé mate ba rai-lulik Timor-Leste.
Notísia Relevante: KM aprova tema komemorasaun loron 20 maiu ‘hametin instituisaun Estadu hodi serbí povu’
“Hanoin kona-ba ita-nia independénsia, hanoin kona-ba restaurasaun, ita hanoin kona-ba ita-nia aan, hanoin ema hotu ne’ebé kontribui ba ita-nia restaurasaun independénsia. Hanoin kona-ba timoroan hotu-hotu ne’ebé liuhusi dalan oioin kontribui ona ba rai ida-ne’e. Barak mak ita mós hatene mate, raan fakar maibé to’o agora ema lahatene. Momentu ida, ita atu hatene ema hotu-hotu, kiik ka boot, sira ne’ebé nonook no naran ema la temi,” Dom Vírgilio Kardeál do Carmo da Silva, SDB, hateten ba jornalista sira nakait ho enkontru sinodal bispu sira nian, iha Balide, kuarta ne´e.
Komemorasaun 20 maiu hanesan momentu ida fó tempu ba timoroan hotu atu rekoñese no reza ba sira, liuliu sira-ne’ebé mate tiha ona Maromak haraik fatin ba sira, rekompensa sira-nia esforsu tomak hodi hola parte iha Timor-Leste nia luta ba ukun rasik aan.
“Parabéns ba povu tomak no timoroan tomak ne’ebé dala ida tan hakat ba iha momentu istóriku ita-nia rai ne’e ninian iha 20 de maiu, festa ita nian,” Dom Virgílio Kardeál hateten.
Loron restaurasaun ne´e provoka ema hotu atu hanoin oinsá mak timoroan sira sente sente ukun rasik aan hodi hola parte ba iha dezenvolve rai ida-ne’e nian.
“Selebrasaun ida-ne’e lori ita atu hateke fila ba kotuk kona-ba funu ba libertasaun patria. Agora, iha era ukun rasik aan tinan 22, ita mos presiza saída, oinsa ita kontribui liután, kaer liman hamutuk bele dezenvolve rai ida-ne’e di’ak liután, atu povu hotu-hotu kiik ka boot sente katak Timor ne’e ha’u-nian no ha’u sente duni ukun rasik aan,” nia dehan.
Timoroan tomak tenke halo reflesaun ida-kle’an ba kondisaun iha área remota balun ne´e Estrada laiha no iha maibé aat tebe-tebes, la asesu eletrisidade no súde, la hetan bee-moos, eskola dook husi labarik no populasaun sira, nune’e halo reflesaun katak saida mak timoroan ida-idak bele halo atu hotuohotu sente katak Timor ne’e ema hotu nian.
Jornalista : Jesuína Xavier
Editór : Cancio Ximenes
