DILI, 16 maiu 2024 (TATOLI)—Diretór Ezekutivu Centro Nacional Chega, Institutu Públiku (CNC, I.P), Hugo Maria Fernandes, informa, empreza iha semana kotuk hahú mobiliza ekipamentu serbisu hodi hamoos fatin konstrusaun edifísiu foun sentru arkivu.
“Empreza agora hahú serbisu sobu uma no hamoos fatin ka site clearing, projetu ne’e ba tinan-ida nian, loloos ne’e hahú iha fulan-fevereiru maibé foin hahú iha abríl, entaun buat hotu la’o di’ak sei ramata abríl tinan oin,” Diretór informa iha salaun CNC, I.P, Balide, kinta ne’e.
Notísia relevante : CNC, I.P sei harii sentru arkivu foun iha tinan ne’e
Sentru arkivu foun ne’ebé sei harii tinan ne’e importante tebes tanba sei kompleta ho ninia biblioteka no auditóriu.
CNC, I.P halo kooperasaun ho Ministériu Planeamentu Investimentu Estratéjiku (MPIE) no Sekretariadu Grande Projetu (SGP) hodi harii edifísiu foun ne’e, ho kustu $941.103,73.
Projetu ne’e toma konta hosi empreza nasionál rua ne’ebé halo konsórsiu hanesan Nazareth Unipessoal Lda hamutuk ho Quatro Colegas Lda.
Jornalista : Arminda Fonseca
Editora : Julia Chatarina
