PN hein Governu pronunsia kandidatu komisáriu CAC
DILI, 16 maiu 2024 (TATOLI)—Parlamentu Nasionál (PN) hein Governu pronunsia kona-ba kandidatu komisáriu Komisaun Anti-Korrupsaun (CAC, siglá portugés).
Notísia Relevante: Komisáriu CAC Sergio Hornai nia mandatu ramata iha 21 janeiru
Antes ne’e, Governu hato’o ona kandidatu komisáriu CAC ho lista úniku mai PN, maibé kontinua laiha konsensu entre bankada sira, nune’e Governu aprezenta alterasaun daruak husi lei númeru 8/2009, loron 15 Jullu, kona-ba CAC, ho ida ne’e PN halo ona aprovasaun iha finál globál no haruka ba Prezidente Repúblika promulga ona.
Tanba ne’e, PN hein Governu pronúnsia fila-fali mantein kandidatu ida antes ne’e aprezenta ona ka sei troka fali kandidatu seluk hodi bele submete mai iha PN.
“Seidauk, ami espera ohin (reuniaun líder bankada) pronúnsia, maibé Vise Ministru asuntu Parlamentár la marka prezensa (iha enkontru líder bankada ohin), nune’e Parlamentu hein,” Sekretária Meza Parlamentu Nasionál (PN), Vírginia Ana Belo, hateten ba jornalista sira hafoin reuniaun líder bankada iha sala konferénsia Parlamentu, kinta ne’e.
Antes ne’e, iha 22 abríl, PN liuhusi reuniaun plenária aprova alterasaun daruak husi lei númeru 8/2009, loron 15 Jullu, Komisaun Antí-Korrupsaun (CAC, siglá portugés) iha finál globál ho votu a-favór 37, kontra no abstensaun 0.
Tuir textu orijinál ne’ebé Governu aprezenta ba alterasaun husi lei númeru 8/2009, loron 15 Jullu, hanesan iha artigu 7 númeru 1, katak komisáriu designa husi Parlamentu Nasionál liuhusi proposta Governu, ho maioria absoluta husi Deputadu, no toma pose perante husi Prezidente Parlamentu Nasionál.
Artigu 11 iha alínea g), exonerasaun, aprova husi maioria absoluta husi deputadu, liuhusi fundamentu husi Primeiru-Ministru, iha kazu violasaun obrigasaun husi komisáriu dekorente iha lei.
Iha númeru 9, iha kazu sesaun mandatu ho termu mezmu, komisáriu mantein ninia funsaun to’o pose titulár foun.
Iha diskusaun espesialidade ne’e, deputadu sira aprezenta proposta alterasaun ida ba artigu 11 husi textu orijinál ba proposta alterasaun ne’e, hodi armoniza liafuan balun.
Entretantu, iha diskusaun no votasaun alterasaun lei CAC ne’e, Deputadu husi bankada opozisaun FRETILIN ho PLP la partisipa.
Antes ne’e, Komisáriu CAC sesante, Sérgio Hornai da Costa, ninia mandatu ramata iha 21 janeiru 2023, ne’ebé to’o agora seidauk iha naran foun okupa kargu ne’e tanba laiha konsensu entre Deputadu bankada Governu no opozisaun.
Liuhusi reuniaun líder bankada PN, konsege halo ona ajenda da-neen hodi diskute kona-ba naran Komisáriu ne’ebé Governu propoin ona, maibé tanba razaun téknika ka kórum la to’o mak la konsege realiza to’o agora.
Iha loron 19 fevereiru, Governu haruka ona naran Rui Pereira dos Santos, nu’udar kandidatu úniku ba Komisáriu CAC.
Jornalista : Nelson de Sousa
Editór : Cancio Ximenes
