DILI, 16 maiu 2024 (TATOLI)—Parlamentu Nasionál (PN) tau ona ajenda reuniaun plenária extaordinária iha 22 maiu tinan ne’e sei hala’o debate ho Ministra Saúde (MS), Elia dos Reis Amaral.
Notísia Relevante: HNGV falta stock ai-moruk 20%
“Iha kuarta-feira semana oin, iha plenária extaordinária ho Ministra Saúde kona-ba asuntu saúde jerál ne’ebé akontese iha ita-nia rai,” Sekretária meza Parlamentu Nasionál (PN), Virgínia Ana Belo hateten ba jornalsita sira hafoin enkontru reuniaun líder bankada iha sala komferénsia Parlamentu.
Nia hatutan, debate ne’e sei ko’alia inklui ho problema ai-moruk stock out maibé problema saúde barak tebes ne’ebé sei abranje ba asuntu sira seluk iha área saúde.
Enkuantu, tuir Konstituisaun Repúblika Demokrátika Timor-Leste (KRDTL) iha artigu 92 (Definisaun) Parlamentu Nasionál mak órgaun soberania Repúblika Timor-Leste nian ne’ebé reprezenta ema timoroan tomak, iha kbiit atu halo lei, atu fiskaliza no atu halo desizaun polítika.
Tuir rejimentu PN, bainhira deputadu sira levanta beibeik preokupasaun iha área saida de’it bele mós bolu direta membru Governu iha área tutela hodi halo debate, atu bele hatene polítika no medida saida mak buka solusiona ba preokupasaun ne’ebé iha.
Enkuantu, PN bolu Ministra Saúde hodi halo debate tanba iha reuniaun plenária iha loron segunda-tersa ne’e, Deputadu sira sempre hato’o preokupasaun iha área saúde.
Jornalista : Nelson de Sousa
Editór : Cancio Ximenes
