iklan

DESPORTU, HEADLINE

Xefe Governu abertura tasa Komisaun Funsaun Públika 2024

Xefe Governu abertura tasa Komisaun Funsaun Públika 2024

Imajen/Media GPM

DILI, 16 Maiu 2024 (TATOLI)- Primeiru-Ministru (PM), Kay Rala Xanana, akompaña hosi Ministru Asuntu Kombatente Libertasaun Nasionál, Gil da Costa Monteiro “Oan Soru”, Ministru Juventude, Desportu, Arte no Kultura, Nelyo Isaac Sarmento, Prezidente Komisaun Funsaun Públiku, Agostinho Letêncio de Deus, halo abertura ba torneiu tasa Komisaun Funsaun Públika, tinan 2024.

Primeiru-Ministru konsidera atividade desportiva ida-ne’e halo funsionáriu sira koñese malu di’ak liu tán nune’e bele servisu hamutuk hodi serbí povu no nasaun ho di’ak liután.

Imajen/Media GPM

“Desportu ne’e forma ida, funsionáriu sira iha Instituisaun Estadu nian tomak bele hasoru-malu, koñese malu, respeita malu. Hahú hosi kedan atividade ne’ebé iha espíritu desportivu, la’ós atu baku malu, tebe malu, hotar malu, tolok malu maibé saida mak ita iha, ita fó, katak manán ne’e manán, no lakan ne’e lakon,” PM Xanana hateten iha ámbitu abertura torneiu taxa Funsaun Públik, iha Ministériu Juventude, Desportu, Arte no Kultura, Lecidere, kinta kalan.

Xefe Governu afirma, tinan-tinan halibur funsionáriu sira hodi kria amizade, nakonu ho espíritu tulun malu no espíritu respeita malu. Sai funsionáriu iha dever nu’udár sidadaun, servisu bá nasaun no bá povu.

Tasa Funsaun Públika ne’e prienxe hosi Modalidade tolu hanesan, Futsal feto no mane, Basketbal feto no mane, no Volleyball feto no mane. Futsal mane mai hosi Ministériu no Instituisaun Estadu 53, Futsal feto 52, Basketball mane 47, Basketball feto 36, no volleyball mane 36 feto 30.

Abertura hahú ho Basketball feto hosi Ministériu Negósiu Estranjeiru no Kooperasaun (MNEK) kontra Ministériu Juventude, Desportu, Arte no Kultura (MJDAK), Futsal feto ekipa hosi Sekretaria Estadu Kooperativa (SEKoop) kontra ekipa Ministériu Kombatente Libertasaun Nasionál (MKLN), enkuantu Volleyball mane ekipa MJDAK kontra ekipa Ministériu Administrasaun Estatál (MAE).

Torneiu taxa Funsaun Públika ne’e realiza hodi selebra loron Nasionál Funsaun Públika ne’ebé akontese iha loron 15 Jullu, ne’ebé tinan ne’e sei selebra bá dala-10. Torneiu ne’e hahú loron 16 Maiu sei termina iha loron 12 Jullu 2024.

Notisia relevante:Kopa Xanana ho vizaun promove joven sira nia talentu

Jornalista: Hortrncio Sanchez

Editór      : Florencio Miranda Ximenes

iklan
iklan

Leave a Reply

iklan
error: Content is protected !!