DILI, 16 Maiu 2024 (TATOLI)–Bispu Dioseze Baucau no Sekretáriu Konferénsia Episkopál Timorense (CET), Dom Leandro Maria Alves, inaugura sede Konferénsia Episkopál Timorense (CET) iha Bidau Mota Klaran.
Notísia Relevante: Kada tinan, Governu fó subvensaun millaun $15 ba Igreja Katólika
Sede CET ne´e sai fatin atu bispu sira husi dioseze Baucau, Dili no Maliana hala’o servisu pastorál nian, no sede foun ne’e hamutuk haat ne´ebé kompostu husi konstrusaun foun no tolu hetan reabilitasaun hahú hosi tinan kotuk.
“Iha ne’e iha departamentu hotu-hotu CET nian mai hotu iha ne’e atu fasilita kontaktu no termu de servisu igreja Timor,” Bispu Dioseze Baucau no Sekretáriu Kofenrénsia Episkopál Timorense (CET), Dom Leandro Maria Alves, hateten ba jornalista sira.
Sede Sekretáriu Kofenrénsia Episkopál Timorense (CET) ne´e kompostu hosi departamentu sira hanesan família, justisa no pás, juventude, liturjia, katekeze no mídia.
Sekretáriu Ezektivu CET, Padre Carlos Miguel Pereira Ruben, hateten uniaun bispu sira-nian ho igreja universál mós bazeia ba iha Código Direito Canóniku númeru 447.
Konferensia episkopál hanesan insitituisaun permanente ne’e agrupamentu hosi bispu sira iha nasaun ida ka territóriu determinadu ida-ne’ebé ezerse hamutuk funsaun pastorál balun ba sarani sira iha sira-nia teritóriu, ne’ebé promove bem maior ne’ebé igreja oferese ba ema liuliu forma no métodu apostuladu konvenientemente ajustadu ba sirkunstánsia tempu no fatin iha termu direitu.
“Dokumentu sira-ne’e lori ita ba kompreende konferénsia episkopál ne’e, uluk nana’in ne’e servisu pastorál bispu sira-nian, iha ambitu sira mak hanesan liturjia, dutrina da fé, katekeze, edukasaun, karidade, evanjelizasaun no seluk tan hodi fasilita servisu pastorál amu bispu sira-nian,” Sekretáriu Ezektivu CET, Carlos Miguel Pereira Ruben, hateten iha diskursu iha serimónia inaugurasaun ne’e.
Nia konsidera, inaugurasaun ba iha sede CET ne’e pasu importante iha Konferénsia Episkopál Timorense nia istória no edifisiu CET ne’e halo parte iha finansiamentu subvensaun husi Governu liuliu husi Servisu Apoiu Sosiedade Sivil no Auditória Sosiál (SASCAS, sigla portugés).
Iha inaugurasaun ne’e partisipa husi Nunsiu Apóstolika Vatikanu nian iha Timor-Leste, Marco Sprizzi, Bispu Arkidioseze Metropolitana Dili, Dom Vírigilio Kardeál do Carmo da Silva, padre no relijioza no funsionáriu CET nian.
Jornalista : Jesuína Xavier
Editór : Cancio Ximenes
