EDUKASAUN

MESSK oferese millaun $5 ba instituisaun ensinu superiór

MESSK oferese millaun $5 ba instituisaun ensinu superiór

Diretora Jerál Ensinu Superiór Siénsia no Kultura, Maria Filomena Guterres Lay. Imajen Tatoli/Francisco Sony

DILI, 17 maiu 2024 (TATOLI)–Ministériu Ensinu Superiór Siénsia no Kultura (MESSK) oferese millaun $5 ba ensinu superiór iha Timor-Leste hodi halo atividade no programa.

“Ami-nia parseiru maka instituisaun ensinu superiór publiku no privadu, ne’ebé halo atividade ruma sempre iha liña kordenasaun ida-ne’ebé di’ak, atividade no programa ne’ebé la’o kedas iha Governu anteriór to’o agora maka runiaun ho reitór sira, entaun instituisaun hotu-hotu mai tau sira-nia sujestaun, hanoin no ministériu tetu, nomós balun implementa. Tanbe ne’e, iha tempu janeiro mai iha Governu atu fó apoiu millaun $5 ba instituisaun privadu sira,” Diretora Jerál MESSK, Maria Filomena Guterres Lay, informa ba Agência Tatoli, iha ninia knaar fatin, Colmera, sesta ne’e.

Nia dehan, durante ne’e MESSK ho universidade iha liña koordenasaun di’ak, universidade manda proposta ba ministériu hodi relata kondisaun no ajusta buat balun, ikus liu avansa ba asinatura akordu.

Notísia relevante : MESSK-UNTL asina nota entendimentu ba implementasaun baze dadus ensinu superiór

Ho nune’e ministériu sei transfere osan ba apoiu instituisaun sira no prosesu sira ne’ebé la’o ona, agora iha faze atu asina akordu entre instituisaun ensinu superiór 17 ho MESSK, atu nune’e bele  avansa ba transferénsia osan hodi bele uza iha tinan 2024.

“Ita la’ós fó instituisaun hanesan hotu, maibé bazeia ba avaliasaun tempu hira mak serví ona ba rai ida-ne’e, ida-ne’ebé avalia instituisionál dala-tolu ona, balun dala-rua no balun dala-ida, bazeia ba avaliasaun Ajénsia Nasionál Akreditasaun Avaliasaun Akadémika (ANAAA) nian,” nia akresenta.

Direitór Ezekutivu ANAAA, Nilton Paiva Mau, informa, ANAAA halo kooperasaun di’ak ho universidade sira no sempre envolve ensinu superiór ba atividade sira.

“Nune’e mós ensinu superiór sira sempre konvida ANAAA hodi partisipa iha serimónia ka atividade sira-nian. Aleinde ne’e halo monitorizasaun anuál ba progresu ensinu superiór sira em termo de kualidade aprendijazen, peskiza no serbisu komunitariu,” Paiva tenik.

Jornalista     : Osória  Marques

Editora          : Julia Chatarina

iklan
iklan

Leave a Reply

iklan
error: Content is protected !!