COVALIMA, 17 Maiu 2024 (TATOLI) – Prezidente Autoridade Munisípiu (PAM) Covalima, Miguel Armada Cardoso, orienta ona Sekretáriu Administrasaun Finansa (SAF) no Diretór Servisu Munisipál Patrimóniu Lojístika atu kontrola funsionáriu no kargu xefia sira ne’ebé uza veíkulu Estadu liu oras serbisu no iha fin semana.
“Ha’u hatún ona orientasaun atu halo jestaun no kontrola veíkulu Estadu ne’ebé diretór no sekretáriu uza hodi halo movimentu ne’ebé lahetan autorizasaun husi PAM”, Miguel Armada Cardoso dehan ohin.
Autoridade ne’e dehan lei hatuur ona katak diretór munisipál uza veíkulu Estadu hodi halo movimentu tenke iha gia serbisu no hetan autorizasaun hosi prezidente autoridade, bainhira laiha labele halo movimentasaun.
Maske PAM hatún ona orientasaun, maibé durante ne’e, seidauk observa kargu xefia ho funsionáriu halo movimentu liu oras serbisu no iha fin semana. “Se PAM simu keixa, sei aplika sansaun administrativa hodi fó xamada atensaun no prosesa tuir lei patrimóniu ne’ebé vigora ona” afirma.
Lei sira ne’e mak Dekretu-lei númeru 80/2002 kona-ba regulamentu viatura Estadu nian, Dekretu-lei númeru 6/2003 kona-ba kódigu estrada, sirkulár númeru 003/GPM/111/2009 kona-ba jestaun téknika karreta Estadu, sirkulár númeru 001/GPM/X/2012 kona-ba kontrola movimentu viatura Estadu ho padraun prosedimentu operasionál.
Tuir dadus Servisu Munisipál Patrimóniu Lojístika, patrimóniu Estadu iha Covalima hamutuk 6.930, husi númeru ne’e patrimóniu ne’ebé aat hamutuk 1.219 no ida ne’ebé daudaun uza iha 5.711. Dadus ne’e seidauk define loloos karreta ho motorizada hira mak apoia serbisu xefe suku na’in-30, administradór postu hitu no diresaun 18 iha Covalima.
Jornalista: Celestina Teles
Editora:Maria Auxiliadora
