HEADLINE, LIFESTYLE, MUNISÍPIU, OÉ-CUSSE (RAEOA)

RAEOA promove kultura Atoni-oan ho kompetisaun artista lokál   

RAEOA promove kultura Atoni-oan ho kompetisaun artista lokál   

Prezidnete Komisaun Organizadora ba kalan kulturál, Morga de Fátima Ote. Imajen Tatoli/Abílio Elo Nini.

OÉ-CUSSE, 17 maiu 2024 (TATOLI) – Autoridade Rejiaun Administrativa Espesiál Oé-Cusse Ambeno (RAEOA), realiza kalan kulturál iha monumentu Lifau, hodi promove tradisaun kulturál nu’udar Atoni-oan no promove mós banda múzika no artista lokál sira.

“Sesaun kalan kultura, iha atividade tolu mak realiza hanesan; promove dansa no kantigu tradisionál sira mai husi suku 18, kompetisaun banda múzika no promove artista lokál sira husi Oé-Cusse,” Prezidente Komisaun Organizadora ba sesaun kalan kulturál, Morga de Fátima Ote, ba jornalista sira iha monumentu Lifau, sesta ne’e.

Notísia relevante:Feira livru iha Oé-Cusse abitua leitura no promove literasia

Nia informa, atividade kalan kulturál ne’e realiza durante loron lima, hahú loron 15 sei remata iha loron 19 maiu fulan ne’e ho intensaun  atu komemora loron restaurasaun independénsia 20 maiu tinan ne’e.

Promove dansa iha RAEOA
Promove dansa kulturál no kompetisaun artista lokál iha Oe-Cusse. Imajen espesiál.

Nune’e partisipa iha kalan kulturál ne’e, mai husi komunidade suku 18, kada suku aprezenta dansa tradisionál, hanesan tebe-tebe, kantigu tradisionál sira hanesan; sermónia kolleta batar, kantiga hamoos duut, kantiga ko’a bani, hú karau dikur, ko’a violiñu, dansa koremetan no seluk-tán.

Alende ne’e mós kompetisaun banda múzika sira hamutuk lima (5) no kompetisaun ba artista lokál sira atu persiza promove sira-nia talentu tantu mane no feto, juniór no seniór.

Tuir nia, kona-bá prémiu sira-ne’e, sei oferese hahú husi primeiru to’o kuartu lugár, no sira-ne’ebé mak la konsesge hetan sorte di’ak iha kalan kulturál ne’e, komisaun organizadora sei fasilita apoia fundu transporte bainhira fila-fali ba hela-fatin.

“Atividade kalan kulturál ida-ne’e, ami hakarak promove nafatin, dansa tradisionál sira, tanba durante ne’e nia ezisténsia hahú menús daudaun ona, tan ne’e liuhusi atividade ne’e ami hakarak hamoris fali, kultura ne’ebé mak ita-nia bei-ala sira rai husi mai jerasaun, atu kontinua promove nafatin,” nia esplika.

Lúcia Bobo husi Suku Costa, rekomenda ba Governu liuhusi Autoridade RAEOA atu kontinua nafatin promove kostume nu’udar kultura Atoni.

“Ami haree di’ak, tanba ikus-ikus ne’e labarik foin sa’e sira kuaze atu haluha ona, tan ne’e ita agradese ba Governu tanba bele loke atu promove kultura sira hanesan ne’e, atu fó hanoin nafatin mai ita, liuliu joven sira atu banati tuir, maibé ita triste tanba ema ladún barak atu partisipa iha kalan kulturál ne’e,” nia katak.  

Jornalista: Abílio Elo Nini

Editór: Evaristo Soares Martins

iklan
iklan

Leave a Reply

iklan
error: Content is protected !!