CMCLN Baucau husu sidadaun hotu kontribui liberta povu
BAUCAU, 20 maiu 2024 (TATOLI) – Konsellu Munisipál Kombatete Libertasaun Nasionál (CMCLN, sigla Portugés) Baucau husu sidadaun hotu atu hamutuk luta hodi kontribui ba luta liberta povu.
Sekreteriu jerál CMCLN Baucau, Manuel “Alari” da Costa Soares, hato’o mensajen ne’e relasiona ho selebrasaun Restaurasaun Independénsia ne’ebé selebra ba da-22 liuhusi luta naruk husi saudozu hotu ne’ebé mate ba ukun aan.
“Libertasaun pátria ita hala’o ona, agora tinan 22 ona nee dehan ita la’o dook ona, entaun ema hotu-hotu kontribui atu ita too iha pontu libertasaun ba povu,” Sekretáriu CMCLN Baucau hateten iha Vila Nova, segunda ne’e.
Maske iha ona mudansa durante tinan-22 ne’e maibe nu’udar veteranu tenke hamriik iha oin hamutuk ho joven hotu hodi luta nune’e kontribui liberta povu.
Alari konsidera veteranu mak sai autór ba libertasaun nasionál tenke kontinua iha liña oin hanesan kaer metin obra, libertasaun povu nune’e bele atinje no garante povu ba moris prósperu.
“Ita-ne’ebé sei moris kuida obra ne’e ho didi’ak, tanba ema mate mak harii rai ida-ne’e, tenke kuida no proteje atu ukun-aan bele fo rezultadu diak ba povu-nia moris,” Alari akresenta.
CMCLN husu IX Governu Konstitusionál kontinua hakbesik aan ba povu liu-liu iha área remota sira hodi identifika problema no tau iha planu prioridade atu responde durante mandatu tinan-lima.
Notísia relevante: Baucau-oan tenke konsidera malu hodi hasoru podér lokál no desentralizasaun administrativa
Jornalista : Natalino Belo
Editór : Evaristo Soares Martins
