DILI, 20 maiu 2024 (TATOLI) – Ministru Justisa Sergio da Costa Hornai, hatetetn Ekipa Traballu ba Reforma Justisa lideradu hosi Lucia Lobato submeter ona relatóriu finál reforma justisa ba Primeiru-Ministru Xanana Gusmão.
“Bom, ha’u seidauk haree relatóriu ne’e maibé relatóriu ne’e entrega ona ba Xefe Governu”, Hornai dehan ba jornalista sira bainhira partisipa serimónia loron restaurasaun independénsia Timor-Leste ba dala-22 ne’ebé hala’o iha Palásiu Prezidensiál Segunda, ohin.
Nia dehan, relatóriu ne’e sei haree no Xefe Governu hato’o ba Konsellu Ministru hodi aprova hafoin rekomenda ba instituisaun relevante sira atu implementa.
“Konserteza ekipa servisu halo ona submisaun relatóriu ba Xefe Governu depois ekipa ne’e konklui tiha sira-nia servisu, hosi ne’ebá Xefe Governu sei haree halo apresiasaun ida klean no haree buat sira ne’e hotu se for nesesáriu, Xefe Governu sei hato’o ba Konsellu Ministru hodi aprovasaun no Konsellu Ministru rekomenda ba institusaun relevante atu implementa”, nia afirma.
Rekorda fali katak Xefe Ekipa Traballu ba Reforma Justisa Lucia Lobato hateten, servisu Ekipa Traballu ba Reforma Justisa konklui ona relatóriu ba reforma justisa no nia submete ona relatóriu ne’e ba Primeiru Ministru Xanana Gusmão.
Jornalista: Natalino Costa
Notísia relevante : MJ fiar Lucia Lobato sei fó susesu ba servisu reforma iha setór justisa
Xefe Estadu husu Grupu Traballu halais servisu ba reforma justisa
