BOBONARO, 20 maiu 2024 (TATOLI)-Hafoin sai inspetór ba serimónia komemorasaun loron Restaurasaun Independénsia Timor-Leste ba da-22, Prezidente Autoridade Munisipál Bobonaro, Alexandrino Pires, husu joven sira atu partisipa ativu iha prosesu dezenvolvimentu nasionál, hodi hatutan erói sira-nia prinsípiu ba ukun-aan.
“Juventude iha papél importante iha prosesu dezenvolvimentu, juventude mak sai forsa ba dezenvolvimentu, ne’ebé prepara-an didi’ak tanba ita-boot sira mak kontinuadór ba nasaun ida-ne’e, espesiál ba munísipiu Bobonaro, tanba to’o tempu ida ami sira-ne’e laiha hotu, ita-boot sira mak nu’udar juventude mak lidera fali munisípiu ida-ne’e ba oin,” nia hateten iha kampu Futeból Maliana, segunda ne’e.
Nia agradese no louva tanba komunidade sira iha kapitál Maliana no postu administrativu sira hahú horisehik (19/05) kedas to’o ohin (20/05) ne’e entusiazmu tebes partisipa iha loron importante ne’e.
Nia observa, ida-ne’e atu hatudu katak komunidade sira konsiente katak komemorasaun loron Restaurasaun Independénsia presiza ema hotu nia partisipasaun.
“Loron ida ohin loron espesiál duni ba ita hotu, ita mai komemora ne’e lori hanoin hikas ita-nia asuwain, eroi, mártir sira-ne’ebé ohin loron hakat ona ba mundu seluk, inklui mós padre, madre lubuk boot ida, sakrifika sira-nia vida tomak ba ukun rasik-aa,” nia haktuir.
Komunidade Maliana, Fernando Moises Perreira, agradese ba Governu ne’ebé kontinua realiza komemorasaun loron importante ne’e.
Nian hatutan, 20 maiu nu’udar loron importante tebes ba povu hotu, tanba ohin loron Timor-Leste hamriik hanesan país demokrátiku, independente iha mundu nia leet, mai husi kontribuisaun ema hotu.
“Ami mai partisipa iha hasa’e Bandeira ba 20 maiu ne’e, mai atu hatudu ami-nia sentidu nasionalizmu ho patritizmu ba ita-nia rai no fó onra no glória ba erói sira-ne’ebé liu ona ba mundu seluk, tanba uluk ita sosa ho raan no ruin,” nia katak.
Enkuantu serimónia hasa’e Bandeira ne’e, partisipa husi Bispu Dioseze Maliana, Dom Norberto do Amarál, Komandante PNTL Munisípiu Bobonaro, Superintendenti Xefe Agustino Gomes da Silva, Prezidente Konsellu Veteranu Munisípiu Bobonaro, Jaime Romão ‘Dotim’, no veteranu sira, estrutura autoridade munisipál, autoridade sivil, militár, no hetan partisipasaun másimu husi komunidade postu administrativu Maliana ne’ebé mai husi suku hitu.
Serimónia ne’e hetan animasaun drum band husi estudante Koléjiu Infante de Sagres Maliana no atrasaun husi Karate filiál Munisípiu Bobonaro, enkuantu atividade ne’ebé realiza hodi komemora loron importante ne’e mak hanesan, halai maratona, marsa saudável, sa’e bua no dahur ho tebe-tebe.
Orsamentu ne’e autoridade munisipál Bobonaro aloka hodi realiza eventu ne’e hamutuk rihun $10-resin, montante ne’e fahe mós ba postu administrativu sira ne’ebé ho nia valor la hanesan.
Notisia relevante: PAM Bobonaro inisia hamoos lixu iha Maliana
Jornalista: Sérgio da Cruz
Editór: Evaristo Soares Martins
