PAM Bobonaro inisia hamoos lixu iha Maliana
BOBONARO,19 abríl 2024 (TATOLI)-Prezidente Autóridade Munisípiu Bobonaro, Alexandre Pires, sesta ne’e, hamutuk ho funsionáriu públiku sira hahú inisia atividade limpeza jerál hodi hamoos lixu iha Maliana.“Hau orienta ona Administradór Postu sira no hasai ona sirkulár ba líder komunitária suku 50,atu organiza no orienta xefe aldeia halo limpeza rutina kada sesta, ne’ebé mobiliza ita-nia inan-aman sira iha baze hamoos ida-idak nia bairu, se ita la hamos bairu fo’er hela, ita mak husu hela de’it estadu, entaun limpeza ida ne’e atu halakon buat ida hamoos uma oin selu $3 ne’e, ita para ona ho ida ne’e para hadia estrada, bee moos, sintina,”Nia informa ba Jornalista sira,iha Ponte Soso,sesta ne’e.
Limpeza jerál hala’o hosi aréa Soso to’o edifísiu iha Administrasaun munisipál Holsa, postu administrativu Maliana, munisípiu Bobonaro hodi hamoos lixu sira ne’ebé nakonu iha valeta laran tanba menus konsiénsia hosi komunidade hodi so’e fo’ér arbiru.
Notísia Relevante:Autoridade Bobonaro organiza funsionáriu sira hamoos lixu iha kapitál Maliana
Nia dehan, atividade limpeja jerál ne’ebé nia inisia ho funsionáriu iha kada loron sesta ne’e atu oinsá eduka komunidade sira hodi moris iha ambiente moos, no seguru nune’e bele prevene aan hosi moras dengue no moras kontajioza sira.
“Ita moras hakilar estadu, mais uma oin rasik ita husik hela,valeta ko’ak sira bee lihun hela ema saúde no ema sira matenek ne’e sira hatete be lihun ne’e hakiak susuk barak mais ita hakiak nafatin bee-lihun sira ne’e, ida ne’e mak problema ba ita,ne’e mak apela ba hotu-hotu se bele lalika sesta-sesta,uma oin ne’e loraik sira ne’e lalika tuur halimar, ita hamoos daudauk para moos,lalika dada moras mai ita,” nia reforsa.
Iha fatin hanesan komunidade Maliana,Candido Maia Damiao, ne’ebé hola parte iha atividade limpeja jerál ne’e sente apresia ho desizaun ne’e atu bele organiza kapitál munisípiu ne’e moos hosi lixu. No mós hanesan maneira ida atu eduka populasaun sira atu so’e lixu iha fatin lixu.
“Rai ida ne’e ita-nia, ita mak utiliza ninia di’ak ho a’at ne’e, ida ne’e sai xave ba ita-nia komunidade Bobonaro atu hahú bo’ok-an,tanba limpeza ne’e atu eduka ita sai sidadaun ida saudavél no hado’ok aan husi moras,”Candido hatutan.
Entretantu, munisípiu Bobonaro ho ninia área luan 1,368.12 Km2 ne’ebé akumula aldeia 193 suku 50, postu administrativu neen ho nia totál populasaun hamutuk 106,543 hosi xefe fámilia 20,082.
Notísia Relevante:SEATOU husu Autoridade Bobonaro organiza funsionáriu hamoos fo’er kapitál Maliana
