iklan

BOBONARO, MUNISÍPIU

Autoridade Bobonaro organiza funsionáriu sira hamoos lixu iha kapitál Maliana

Autoridade Bobonaro organiza funsionáriu sira hamoos lixu iha kapitál Maliana

Prezidente Autoridade Munisipál Bobonaro, Alexandrino Pires, hamutuk ho funsionáriu hamoos hela lixu iha valeta parte merkadu Maliana. Imajen espesiál.

BOBONARO, 05 abríl 2024 (TATOLI)-Prezidente Autoridade Munisipal (PAM Bobonaro, Alexandrino Pires, sesta ne’e organiza funsionárių públiku sira halo atividade limpeza jerál hodi hamoos lixu sira neʼe-ne’ebé naklekar iha kapitál Maliana.

Atividade ne’e hahú edifísiu públiku Autoridade Munisipál Bobonaro ba merkadu sentrál kapitál Maliana Vila to’o kruzamentu parte Ofisina Doping oin diresaun ba Obor.

Notisia Relevante:PAM Bobonaro husu traballadór PMOPA serbisu ho loloos

“Ha’u-nia intensaun simples de’it, tanba ita-nia munísipiu fo’er la halimar, hahú hosi edifísiu sira iha estrada ibun barak loos, nunka iha sentimentu atu hamoos, hein de’it, hein to’o duut sa’e to’o taka edifísiu, lakon hotu, labele hein povu mak hamoos, ita kada fulan simu osan ne’e mak tenke hamoos,” nia ko’alia iha EBC Raifun.

Ba oin, nia parte sei hasai sirkulár ida ba administradór postu administrativu, xefe suku no xefe aldeia hotu atu organiza komunidade halo limpeza kada sesta.

PAM Bobonaro hanaran atividade ne’e Sesta Unidade limpeza Jerál, nune’e bainhira líder komunitaria sira la kumpre, sei suspende insentivu mensál.

“Sira organiza limpeza moos ona mak foin aprova osan, ita simu osan ne’e raan ho ruin entaun ita presiza hadi’a ita-nia munisípiu rasik, ita nia hela fatin, labele hein ema seluk mai mak hamoos,” nia fó hanoin.

Agustina Moniz, nu’udar negosiante lokál merkadu Maliana, sente kontente no agradese ba Prezidente Autoridade Munisipál neʼebé iha inisiativa di’ak atu hamoos lixu iha valeta no fatin públiku sira.

“Ita-nia prezidente uluk moos mai hateten bebeik hamoos lixu, agora ida foun mai hamoos tán, ne’e ezemplu di’ak ba ita, ba oin ami mós sei halo limpeza sesta-sesta, tanba ami moe ita nia nai-ulun munisipiu, nia bele ra’ut fo’er iha kanu laran, nusa mak ita povu labele, ita mak soe foer, ita mak tenke hamoos fo’er, fo’er nakonu tanba ita laiha hanoin atu tau iha nia fatin,” nia katak.

Enkuantu hafoin limpeza lixu hirak-ne’e ekipa Diresaun Servisu Munisipál Água, Saneamentu no Ambiente ra’ut tula iha karreta hodi fakar iha lixeira.

Notísia relevante: AMB no funsionáriu sira hamoos lixu iha kapitál Maliana

Jornalista: Sergio da Cruz
Editor: Evaristo Soares Martins

iklan
iklan

Leave a Reply

iklan
error: Content is protected !!