AMB no funsionáriu sira hamoos lixu iha kapitál Maliana
BOBONARO, 05 novembru 2023 (TATOLI) – Prezidente Autoridade Munisípiu Bobonaro (AMB), Ernesto de Oliveira Barreto, akompaña hosi nia adjuntu, João de Fátima do Carmo, no funsionariu hosi liña ministeriál ho delegasaun territoriál sira hotu, segunda ne’e tún direita ba terrenu hodi hamoos lixu ne’ebé naklekar iha kapitál Maliana.
Limpeza ne’e hahú hosi estrada protokolu sira liuliu iha merkadu Maliana hodi kria ambiente ne’ebe saudável prepara ba eventu interkámbiu Festivál Kulturál Fronteira ne’ebé sei realiza iha tempu badak.
Iha atividade ne’e, Prezidente Autoridade Munisípiu Bobonaro, orienta funsionariu sira sobu uma aat, barraka no kalen aat sira iha dalan-ninin ne’ebé negosiante sira hari hodi fa’an mina no fa’an roupa obralan.
Notísia relvante: SEATOU husu Autoridade Bobonaro organiza funsionáriu hamoos fo’er kapitál Maliana
“Aban ami sei mai halo limpeza nafatin, sé la hasai, aban sei hotu ba sampah, prontu imi idak-idak halo limpeza, sa’e mai ne’e tenke rapih ba to’o iha karik ne’ebá, tanba aban ka bainrua ema tama ona mai,” Prezidente Autoridade Munisípiu Bobonaro, aviza ba komunidade sira iha terrenu.
Prezidente autoridade munisípiu Bobonaro halo inspesaun ba restaurante sira, loja xineza no Indonézía nian nune’e hamoos halo didi’ak.
Durante inspesaun ne’e negosiante lokál ho negosiante estranjeiru sira koopera no prontu kumpre desizaun ne’ebé autoridade munisípiu hasai.
“Hahú orsida imi fa’an sasan sira-ne’e hatama hotu ba laran to’o tanggal 21 bele faan fali iha li’ur, ita-boot sira tenke hamoos, pinta halo didi’ak nune’e ita bele hatudu imajen di’ak nasaun nian liuliu munisípiu Bobonaro,” nia fó hanoin.
Notísia Relevante:AMB orienta konsellu suku muda fahi-luhan iha fatin públiku
Jornalista: Sérgio da Cruz
Editór: Evaristo Soares Martins
