COVALIMA, HEADLINE

Partisipasaun komunidade iha isár bandeira importante hodi hatudu sentidu patriotizmu

Partisipasaun komunidade iha isár bandeira importante hodi hatudu sentidu patriotizmu

COVALIMA, 20 Maiu 2024 (TATOLI) – Prezidente Autoridade munisípiu Covalima, Miguel Armada Cardoso, hateten partisipasaun komunidade nian iha komemorasaun ba Loron Restaurasaun Independénsia Timor-Leste iha 20 Maiu pertinente tanba hatudu sentidu patriotizmu.

Tanba ne’e, nia husu ba komunidade presiza iha sentidu nasionalizmu iha eventu ne’e, la’ós atividade jogu sira mak importante.

“Komemora loron nasionál 20 Maiu ba tinan 2024, ita halo  mudansa uitoan, tanba kada tinan ita komemora loron nasionál sempre loke  jogu bola guling, maibé tinan ne’e, ita komemora loron nasionál ho anima komunidade ho atividade desportu tradisionál futu-manu nomós desportu modernu”, Miguel Armada Cardoso hato’o hafoin serimónia isár bandeira, iha kampu Ladi, ohin.

Iha serimónia 20 Maiu ne’e, autoridade Covalima selebra hodi anima populasaun ho jogu futeból, voleiból, basketeból no atletizmu ne’ebe hahú iha 13 Maiu no remata iha 19 Maiu no jogu modalidade tradisionál mak hanesan halai berlindus no dada-tali ne’ebé partisipa husi populasaun iha postu Suai husi suku lima hanesan Beco, Camnasa, Debos, Suai Loro no Labarai, no sa’e bua ne’ebé realiza ohin.

Ho komemorasaun Loron Restaurasaun Independénsia ba da-22, PAM ho nia estrutura ne’ebé foin simu pose foin fulan tolu, iha serbisu balun ne’ebé konsege hahú ona buat balun no balun seidauk no presiza atu kontinua hodi dezenvolve Covalima durante mandatu.

Xefe suku Labarai, Paulo de Sena, dehan komemorasaun 20 Maiu iha duni mudansa kompara ho tinan uluk, tanba autoridade iha programa anima komunidade ho atividade jogu tradisionál sira.

“Ita hatene katak autoridade Covalima komemora Loron Restaurasaun Independénsia ho atividade desportu tradisionál, ita haree komunidade sira entuziazmu, nune’e sira mós sente katak loron nasionál 20 Maiu hanesan loron ne’ebé espesiál ba Timor-Leste hodi restaura nia independénsia”, nia realsa.

Fó hanoin fali katak, komemorasaun loron nasionál ne’e, Covalima aloka orsamentu ho montande rihun $5 ne’ebé prevee boot liu ba seksaun programa ho nia orsamentu $ 2.064, lojístika $1,245, liturjia $400, seguransa $256, sekretariadu $60, primeiru sokorru $50, konsumu $350,  mobilizasaun 500 no protokolu $75.

Notísia relevante: Covalima organiza desportu komunitáriu ho modalidade hitu hodi selebra 20 Maiu

Jornalista: Celestina Teles

Editora:Maria Auxiliadora

iklan
iklan

Leave a Reply

iklan
error: Content is protected !!