COVALIMA, 13 Maiu 2024 (TATOLI) – Komemora loron Restaurasaun Independénsia Timor-Leste ba da-22, Covalima realiza, ohin, abertura ba atividade desportu komunitáriu ho modalidade hitu.
Modalidade hitu ne’e mak futeból, voleiból basketeból no atletizmu no jogu tradisionál mak halai berlindu, dada tali no sa’e bua.
Prezidente Komisaun Organizadora Desportu Komunitáriu 20 Maiu, Filomeno Cardoso, dehan desportu komunitáriu modernu no tradisionál ho intensaun atu anima komunidade iha ámbitu komemora 20 Maiu iha Covalima.
Filomeno Cardoso apela ba jogadór sira atu hatudu talentu no labele hamosu problema, nune’e bele hili jogadór ne’ebé di’ak atu reprezenta Covalima ba jogu nivel rejionál no nasionál.
Komisaun organiza desportu komunitáriu hetan apoiu finanseiru husi Ministériu Juventude Desportu, Arte no Kultura ho montante rihun $6.
Iha sorin seluk, Prezidente Asosiasaun Futeból Covalima, Augusto Henriques, esplika deportu komunitáriu, liuliu futeból partisipa husi suku lima ho klubu ualu husi postu administrativu Suai.
Atividade desportu ne’e sei hala’o durante loron ualu, ne’ebé ohin halo ona abertura no sei remata iha 19 Maiu. Komisaun mós prepara ona prémiu ba jogadór futeból ne’ebé sai vensedór dahuluk hetan osan $400, daruak $300, datoluk $200 no dahaat $100.
Klubu futeból ne’ebé partisipa iha desportu komunitáriu mak FC Habana, Labarai, Suai Loro, Debos, FC Rai Na’in, Sasulis, Camanasa no Beco ne’ebé mai hosi postu Suai.
Notísia relevante: MJDAK disponibiliza rihun $6 ba atividade desportu komunitáriu iha Covalima
Jornalista: Celestina Teles
Editora: Maria Auxiliadora
