iklan

COVALIMA, HEADLINE

MJDAK disponibiliza rihun $6 ba atividade desportu komunitáriu iha Covalima

MJDAK disponibiliza rihun $6 ba atividade desportu komunitáriu iha Covalima

Responsavel Desportu ba 20 Maiu, Augusto Henriques. Foto/Celestina Teles.

COVALIMA, 06 Maiu 2024 (TATOLI) – Ministériu Juventude, Desportu, Arte no Kultura (MJDAK) aloka rihun $6 hodi organiza atividade desportu komunitáriu ba komemorasaun Loron Restaurasaun Independénsia Timor-Leste iha 20 Maiu, iha Covalima.

Responsavel ba Desportu 20 Maiu, Augusto Henriques, informa komisaun submete proposta ho totál orsamentu rihun $8 ba minstériu atu hala’o atividade desportiva, maibé aprova de’it rihun $6.

“Ita submete proposta atu hala’o desportu ho modalidade jogu futeból, voleiból feto-mane no basketeból feto-mane, nomós jogu tradisionál hanesan dada-tali, halai berlidus no halai karón, no seluk”, Agusto Henriques adianta, ohin.

Nia esplika katak verba ne’ebé MJDAK aloka ne’e fahe ba prémiu ba manán-na’in sira iha $1000, ba futeból $540, hadi’a kampu $200, sosa bola $80, maibé  la inklui osan ba árbitu sira, nomós  forma tan seksaun administrasaun atu halo regulamentu ba futeból ba klubu sira, seksaun lojístika oinsá mak bele prepara kondisaun kampu no seksaun mídia atu halo relatóriu durante hala’o atividade .

Augusto Henriques salienta katak orsamentu ne’ebé aloka ne’e tanba la sufisiente maka hala’o deit atividade desportiva iha nivél suku ne’ebe pertense ba iha postu Suai, hanesan Camnasa, Suai Loro, Debos, Beco no Labarai.

Aleinde ba atividade desportu nian, autoridade Covalima mós aloka ona rihun $5 hodi finansia atividade ba komemorasaun Loron Restaurasaun Independénsia Timor-Leste ba da-22 no forma ona komisaun organizadora no seksaun 10 atu halo preparasaun hodi selebrasaun loron ne’e.

Seksaun 10 ne’ebé harii ona mak protokolu, programa, konsumu, lojístika, liturjia, limpeza, seguransa, mobilizasaun, monitorizasaun no dokumentasaun ne’ebé kada seksaun lidera husi diretór servisu munisipál, xefe departamentu ho nia funsionáriu sira, nomós sei hala’o tan enkontru ba daruak nune’e kada xefe seksaun aprezenta planu ba orsamentu.

Notísia relevante: Covalima aloka rihun $5 ba komemorasaun 20 Maiu

 Jornalista: Celestina Teles

Editora: Maria Auxiliadora

iklan
iklan

Leave a Reply

iklan
error: Content is protected !!