COVALIMA, 20 Maiu 2024 (TATOLI) – Prezidente Autoridade munisípiu (PAM) Covalima, Miguel Armada Cardoso, entrega prémiu monetáriu ba vensedór sira husi suku lima no instituisaun sira ne’ebé kompete iha atividade desportu komunitáriu, jogu modernu no tradisionál, hodi komemora Loron Restaurasaun Independénsia Timor-Leste ba da-22 iha 20 Maiu.
Iha modalidade voleiból feto, suku Labarai mak sai vensedór dahuluk ne’ebé hetan osan $300, daruak husi Eskola Sekundáriu Jerál Públiku Suai no simu $200, datoluk suku Debos $100 no dahaat mak Eskola Tékniku Vokasionál Akar-Laran ne’ebé simu $75.
Ba modalidade futeból, suku Debos mak sai vensedór no simu prémiu $400, daruak husi suku Beco ho osan $300, datoluk suku Camnasa $200 no dahaat suku Labarai $100.
Ba jogu basketeból, vensedór dahuluk mak Eskola Sekundária Jerál Ave Maria Suai no hetan prémiu osan $200, daruak husi Eskola Sekundária Públika Suai simu $150, datoluk Eskola Sekundária Katólika Ave Maria Suai $100 no Eskola Cafe $50.
Iha modalidade atletizmu, feto halai taru ho kilómetru hitu nia manán-na’in mak Juvita Mendonça no hetan prémiu $100, daruak Clarisia Idalina Amaral $75 no datoluk Célcia Estefânia $50. Ba mane halai taru ho kilómetru 10, Narcísio Ximenes Barros mak sai vensedór ho prémiu $100, Longuinos Amaral iha pozisaun daruak no simu $75 no Luís Henrique Alves iha pozisaun datoluk no simu osan $50.
Ba jogu tradisionál hanesan dada-tali ba mane, suku Camnasa mak sai vensedór ho prémiu monetáriu $175, daruka husi Suai Loro no hetan $150, datoluk suku Labarai $125 no dahaat suku Debos $75.
Kompetisaun ba mane halai berlindu ho kanuru, Adecson Jecri Amaral sai vensedór dahuluk no hetan prémiu $60, daruak Adelino Delima Amaral $40 no datoluk Ferdi de Jesus Mendonça $20. Ba feto, Merliana Maia Pereira mak sai manán-na’in dahuluk no hetan prémiu $30, daruak Denciana da Costa Andrade $20 no datoluk Febiana Bachita de Jesus $10.
“Molok ita hala’o serimónia isár bandeira, ita organiza uluk desportu komunitáriu futeból, atletizmu ba feto-mane, dada-tali ho seluk tan ho susesu hodi anima komunidade sira”, Miguel Cardoso, dehan iha kampu Ladi, ohin.
Tanba ne’e, nia agradese ba kargu xefia sira, nomós komandante PNTL ne’ebé kolabora di’ak hodi hala’o atividade ho susesu.
Iha Sorin seluk, Prezidente Komisaun Organizadora Desportu Komunitária 20 Maiu, Filomeno Cardoso, relata katak desportu komunitária ne’e hetan apoiu orsamentu rihun $6 husi Ministériu Juventude, Desportu, Arte no Kultura (MJDAK).
“Orsamentu ne’e aloka ba atividade operasionál desportiva hamutuk $1.575, ba arbitrajen kada modalidade desportu modernu no tradisionál 1.155”, Filomeno hato’o.
Reprezentante vensedór jogu futeból husi suku Debos, Leonel Pereira Amaral, sente kontente tanba suku Debos maske laiha preparasaun másima, maibé sai vensedór dahuluk iha komemorasaun Loron Restaurasaun Independénsia Timor-Leste ba da-22.
“Hau orgullu ba eventu ida-ne’e. Ami sai vensedór iha kompetisaun deportu, tanba ne’e autoridade Covalima nafatin atu organiza atividade la’os de’it ba komemora loron nasionál sira, maibé presiza mós organiza iha loron baibain hodi anima komunidade”, nia sujere.
Notísia relevante: Covalima organiza desportu komunitáriu ho modalidade hitu hodi selebra 20 Maiu
Jornalista: Celestina Teles
Editora: Maria Auxiliadora
