DILI, 21 maiu 2024 (TATOLI)–Diretór Servisu Saúde munisipiu Dili (SSD), Mateus Pinto, informa, hateten ai-mosruk stock aout iha servisu saúde Dili iha 22,9% korresponde ba iha ai-moruk item 60 ne’ebé kompostu husi ai-moruk nesasariu, vitál, esensiál no konsumavel.
Ai-moruk nesasariu, vitál, esensiál sira-ne´e mak hanesan Sinvastatin 20mg, Vitamin B1 Thiane tablet 50mg, Vitamin B6 Pyridoxin tablet 50mg, Amoxicilin Hydroxide tablet 500mg, Amoxicilin 125mg + Clavulanic Acid 31 25mg, orál suspension 125mg +31 25mg/5ml.
Medikamentu konsumavel kompostu husi Blad Scaple 20, Blad Scaple 22, Canulla Nasal/neonato, Canulla Nasal/child, Syringe disposable 10 ml, Syringe disposable 5ml no selu-seluk tan.
“Kada munisípiu iha ai-moruk item 260. Daudaun ne’e ai-moruk item 60 mak sei mamuk hela. Agora, sira ba check hela iha Institutu Nasionál Farmasia no Produtu Medikamentu (INFPM), keta ai-moruk balun tama karik,” Mateus Pinto hateten ba jornalista sira, iha Sentru Saúde Formosa, tersa ne’e.
Mateus Pinto hateten, sentru saúde sira balun iha Dili laiha ai-moruk, tanba sira mós foti ai-moruk iha ne’e no fó pedidu ba iha INFPM maibé ai-moruk laiha nafatin.
Nia dehan, INFPM mós depende ba iha kompaña ida sosa ai-moruk, tanba aimoruk stock out ne´e INFPM disponível no sira responde lalais de’it pedidu hosi sentru saúde munisipiu sira.
“Kuandu ba mak INFPM dada iis, ita mós dada iis hotu. Situasaun hanesan ne’e agora akontese,” nia dehan.
Iha situasaun sira hanesan ne’e, Mateus Pinto sujere ba ema hotu atu “prevene aan hosi moras do que cura, tamba ai-moruk iha mos dalaruma lakura no dalaruma ai-moruk laiha. Situasaun real mak ne’e”.
Jornalista : Jesuína Xavier
Editór : Cancio Ximenes
