COVALIMA, 21 Maiu 2024 (TATOLI) – Ekipa husi Ministériu Obra Públika (MOP) observa ona auto-estrada iha Covalima atu hasai sedimentasaun ne’ebé taka estrada no difikulta sirkulasaun transporte públiku no privada.
“Ha’u submete karta ba Ministériu Obra Públika atu fó orientasaun ba Institutu Jestaun Ekipamentu, Institutu Públiku [IGE, I. P] atu hasai sedimentasuan ne’ebé taka auto-estrada no nia rezultadu foin lalais ne’e ekipa MOP observa no identifika atu hasai”, Prezidente Autoridade Covalima, Miguel Armada Cardoso, dehan ohin.
Autoridade ne’e salienta katak sedimentasaun iha auto-estrada seidauk hasai no PAM buka solusaun hodi submete karta ba MOP hodi hasai no fasilita movimentu transporte públiku no privada.
“Ita hein tanba pedidu aprezenta ona ba MOP bainhira mak atu hasai, maibé foin lalais sira mai halo ona observasaun hodi identifika sedimentasaun ne’ebé taka auto-estrada”, nia dehan.
Iha sorin seluk, Diretór Servisu Munisipál Obra Públika, Sidónio Gusmão, dehan Servisu Munisipál Obra Públika (SMOP) Covalima halo intervensaun tuir lei númeru 84 ne’ebé ko’alia kona-ba servisu konservasaun no reabilitasaun auto-estrada, nune’e submete de’it pedidu ba nasionál no, tuir diploma ministeriál númeru 42/2016, fó kompeténsia ba Servisu Obra Públika Covalima halo estrada rurál, konstrui, konserva estrada no ponte sira.
“Ita aprezenta ona pedidu ba IGE ne’ebé daudaun ne’e mobiliza ona ekipamentu no ha’u halo konfirmasaun katak atu normaliza estrada Bee-Mean iha suku Fatuleto, postu Zumalai, hafoin mobiliza ekipamentu hodi suru sedimentasaun iha auto-estrada”, realsa.
Obra Públika Covalima la prevee orsamentu ba situasaun emerjénsia, maibé aprezenta de’it pedidu ba diresaun ne’ebé hola responzabilidade kona-ba estrada nasionál.
Governu sentrál aloka Orsamentu Jerál Estadu ba Covalima hamutuk $7.256.651, husi orsamentu ne’e apoia ba administrasaun munisípiu Covalima no postu administrativu hitu hamutuk $3.052.296. Husi orsamentu ne’e aloka ba apoia servisu munisipál $2.450.590 no ba postu administrativu $601.706, no Servisu Munisipál Obra Públika no Transporte $154.449.
Notísia relevante: PAM Covalima aprezenta kestaun tolu ba Ministru Petróleu
Jornalista: Celestina Teles
Editora: Maria Auxiliadora
