COVALIMA, 09 Maiu 2024 (TATOLI) – Prezidente Autoridade Munisípiu (PAM) Covalima, Miguel Armada Cardoso, simu vizita traballu husi Ministru Petróleu no Rekursu Minerál, Francisco Monteiro, ho nia ekipa. Iha sorumutu ne’e, PAM aprezenta problema kona-ba kondisaun autoestrada, projetu Suai Supplay Base no komunidade afetada ba konstrusaun aeroportu Suai.
Miguel Armada Cardoso hateten projetu Suai Supplay Base, kondisaun autoestrada, aeroportu no seluk tan ne’ebé la’o seidauk iha kontinuidade. “Ami hakarak aprezenta kondisaun autoestrada ne’ebé daudaun ne’e rai monu hodi taka no difikulta movimentasaun. Tanba ne’e, presiza atu haree”, dehan iha ámbitu enkontru ho Ministru Petróleu.
Nia fó hanoin katak, molok ne’e, prezidente autoridade Covalima submete ona karta ba Ministériu Obra Públika (MOP) hodi fó orientasaun ba Institutu Jestaun Ekipamentu Apoia Dezenvolvimentu Infraestrutura, Institutu Públiku (IGEADI, I.P) atu hasai sedimentasaun ne’ebé taka autoestrada.
Notísia relevante: PAM Covalima submete pedidu ba MOP hasai sedimentasaun ne’ebé taka auto-estrada
“Maske submete ona karta seidauk iha rezultadu, maibé nafatin aprezenta ba Ministru Petróleu no Rekursu Minerál atu haree direta kondisaun autoestrada iha Covalima”, dehan.
Aleinde ne’e, kona-ba prosesu implementasaun projetu Suai Supplay Base presiza loke sentru formasaun iha área indústria ki’ik. “Sobre kampu aviasaun, foin lalais, programa atu kria bairru foun ba komunidade afetada uma-kain 60-resin, iha suku Labarai, aldeia Holbelis, postu Suai, seidauk hadi’a sira-nia kondisaun, maibé sira hela nafatin”.
Hatán ba kestaun ne’e, Ministru Petróleu no Rekursu Minerál, Francisco Monteiro, konsidera problema ne’ebé prezidente autoridade apezenta ne’e atu buka nia solusaun. Nia salienta katak prezensa ministru ho ekipa téknika atu haree dezeñu nomós kondisaun autoestrada ne’ebé balun hetan danu.
Governante ne’e promete katak, hafoin haree direta iha terrenu, sei koordena ho Ministru Planeamentu no Investimentu Estratéjiku, Gastão de Sousa, no Ministru Obra Públika, Samuel Marçal, atu solusiona kestaun autoestrada iha Covalima, iha tempu besik.
Kona-ba bairru foun, Timor Gap asina ona kontratu no iha semana rua tan bele harii ona bairru foun ba komunidade afetada ba konstrusaun aeroportu. “Hanesan nesesidade ida presiza ho urjente tanba elikópteru husi tasi laran muda hotu iha aeroportu Suai no asuntu seluk mós tama iha planu Ministériu Petróleu.
Hafoin hala’o enkontru ho PAM Covalima, ministru ho nia ekipa tuun bá terrenu hodi haree direta kondisaun autoestrada.
Notísia relevante: Timor GAP indemniza komunidade afetada ba Projetu Suai Supplay Base
Jornalista: Celestina Teles
Editora: Maria Auxiliadora
