NASIONÁL, HEADLINE

Empreza finaliza ona infaestrutura CLS ba kabu fibra ótika iha Bebonuk

Empreza finaliza ona infaestrutura CLS ba kabu fibra ótika iha Bebonuk

Fatin instalasaun ba estasaun atterajen kabu fibra ótika nian, iha Bebonuk-Dili, tersa (21/05/2024). Imajen Tatoli/Egas Cristóvão

DILI, 21 maiu 2024 (TATOLI)–Empreza RMS Engineering and Construction no DXN Limited konklui ona serbisu halo instalasaun ba estasaun atterajen ka cable landing station (CLS) kabu fibra ótika nian, iha Bebonuk, Dili.

“Iha tempu badak empreza sei entrega obra ba Governu,” Diretór Nasionál Infraestrutura no Komunikasaun iha Ministériu Transporte no Komunikasaun (MTK), Ambrosio Amaral, informa ba Agência Tatoli, via telefónika tersa ne’e.

Empreza rua hanesan rua RMS no DXN iha loron 22 setembru 2023 asina ona akordu ho Governu liuhusi MTK hodi implementa projetu ne’e.

Bebonuk sei sai sentru ka destinasaun kabu submarinu fibra ótika atu tama rai-laran.

“Kabu ne’e mai tama iha intalasaun CLS fibra ótika bebonuk, neebé maneja hanesan ne’ebé depende Governu mak jere ka kria ajénsia próriu ida mak atu jere kabu. Ida-ne’e desizaun polítika Governu nian,” nia akresenta.

Notísia relevante : Governu selebra akordu ho empreza rua instala estasaun aterrajen fibra ótika

Obra ne’ebé empreza rua halo iha Benonuk ho kustu konstrusaun hamutuk millaun $2,4, no instalasaun aterrajen kabu millaun $1-resin.

Antes ne’e, Ministru Transporte no Komunikasaun, Miguel Manetelu, hateten, kabu submarinu ne’ebé halo produasaun husi Fransa iha dalan mai ona no tuir previzaun sei to’o Timor-Leste iha fulan juñu 2024 nia rohan.

Polítika dada kabu submarinu husi Darwin mai Timor-Leste nu’udar prioridade Govemu Timor-Leste liuhusi kooperasaun ho Governu Camberra, ne’ebé mai ho objetivu atu eleva kapasidade rede internet iha rai-laran tanba Governu iha programa Governu eletróniku ne’ebé presiza liña internet lais.

Governu prevee millaun $41-resin iha verba Fundu Infraestrutura iha proposta Lei Orsamentu Jerál Estadu (OJE) 2021 hodi halo akizisaun ba ekipamentu informátiku kabu submarinu fibra ótika.

Nune’e, iha empreza internasionál na’in-20 mak antes ne’e konkorre ona prosesu aprovizionamentu konkursu públiku internasionál, hodi sosa no instala ekipamentu kabu submarinu.

Governu Timor-Leste no empreza Alcatel Submarine Network (ASN), iha maiu 2022, asina ona kontratu ba akizisaun no instalasaun ligasaun dijitál iha Timor-Leste, liuhusi kabu submarinu iha sidade Darwin no Port Hedland iha Commonwealth Austrália nian. Projetu ne’e ho kustu millaun $38,6 no iha durasaun entre 01 jullu 2022 no 31 janeiru 2024.

Jornalista     : Arminda Fonseca

Editora          : Julia Chatarina

iklan
iklan

Leave a Reply

iklan
error: Content is protected !!