Janeiru-maiu: Servisu Saúde Dili rejista moras dengue 556
DILI, 21 maiu 2024 (TATOLI)–Diretór Servisu Saúde munisipiu Dili (SSD), Mateus Pinto, hateten husi janeiru toó maiu 2024 ne’e, Servisu Saúde munisipiu Dili (SSD) rejista pasiente dengue hamutuk 556.
Diretór Servisu Saúde munisipiu Dili (SSD), Mateus Pinto, informa, hosi kazu sira ne’e maioria ho idade lima ba leten no inferior tinan lima.
“Pasiente sira entre idade lima to’o 14, tuir mai mak tinan ida to’o haat depois sira seluk tuir,” Diretór Servisu Saúde munisipiu Dili (SSD), Mateus Pinto, hateten ba jornalista sira iha Sentru Saúde Formosa, tersa ne’e.
Nia hateten, pasiente sira-ne’e maioria rejista iha Sentru Saúde Comoro, sentru saúde Viera Cruz no sentru saúde Becora.
Atu prevene moras demgue iha kapitál Dili, nia dehan, servisu saúde hala’o distribuisaun abate kada fulan tolu no fumingasaun foku ba fatin ka área ba pasiente sira-ne’ebé hetan moras dengue.
“Ita halo fumigasaun ba fatin sira pasiente ne’ebé hetan dengue. Hahú husi distánsia 200 ba to’o rezidénsia ema ho moras dengue,” nia dehan.
Nia hateten, ekipa profisionál saúde kontinua halo promosaun ba iha populasaun hodi bele prevene aan ba dengue no moras sira seluk.
“Moras ne’e la’ós foun no komunidade mós komprende buat ne’e. Ita mós fó hatene ba sira atu prevene sira-nia aan,” nia hateten.
Diretór ne’e konsidera iha redusaun ba rejistu kazu dengue iha tinan ida-ne’e kompara ho tinan hirak ba kotuk.
“Ita agradese tanba janeriu mai to’o iha maiu ne’e ita iha 556 de’it, kompara ho tinan 2022 liubá ne’e pasiente to’o rihun no mate 35. Agora ne’e, ita agradese foin rejistu mate ida,” nia adehan.
Jornalista : Jesuína Xavier
Editór : Cancio Ximenes
