COVALIMA, 21 Maiu 2024 (TATOLI) – Prezidente Autoridade munisípiu (PAM) Covalima, Miguel Armada Cardoso, ho nia estrutura aborda kona-ba kontrolu movimentasaun animál iha espasu públiku.
Diskusaun ne’e halo entre PAM ho Sekretáriu Munisipál ba Administrasaun no Finansa, Sekretáriu Munisipál Planeamentu Investimentu no Dezenvolvimentu Integradu no Sekretáriu Munisipál ba Asuntu Sosiál no Organizasaun.
Tuir Dekretu-lei Ijiene Orden Públika ne’ebé vigora iha 2008, molok atu implementa presiza sosiliza informasaun ba komunidade-sira, hafoin bele halo operasaun ba animál ne’ebé husik livre.
“Bainhira mak atu hahú halo operasaun ba animál ne’ebé husik livre iha estrada públika, autoridade sei halo koodenasaun hafoin bele halo operasaun, nune’e animál labele la’o livre iha estrada”, Miguel Cardoso hateten, ohin.
Iha sorin seluk, xefe suku Zulo, João Carvalho, dehan autoridade Covalima la’ós foin mak atu implementa dekretu-lei númeru 33/2008, maibe hahú ona iha 2022 to’o 2023, halo ona operasaun ba komunidade nia animál ne’ebé la’o livre iha espasu públiku.
“Ita implementa ona dekretu-leikona-ba Ijiene Orden Públika, maibé nia implementasaun laiha seriedade, tanba ne’e bainhira implementa fali presiza ho rigór”, nia realsa.
Iha 2022, eis-administradór munisípiu Covalima, Francisco de Andrade, halo ona sensibilizasaun ba informasaun kona-ba dekretu-lei númeru 33/2008, hafoin ne’e forma ekipa task force halo ona operasaun ba komunidade nia animál husik livre iha postu Tilomar.
Aleinde ne’e, iha loron 13 Maiu 2024, Ministériu Administrasaun Estatál (MAE) liuhusi Diresaun Jerál Toponímia no Organizasaun Urbana halo divulgasaun ba dekretu-lei lima ba autoridade sira iha Covalima.
Dekretu-lei ne’e mak númeru 51/2016, primeira alterasaun 31/2017 kona-ba Publisitária, Dekretu-lei 33/2008 sobre Ijiene Orden Públika, Dekretu-lei númeru 12/2014 kona-ba Restrisaun Movimentu Animál iha Área Urbana, Dekretu-lei númeru 11/2014 kona-ba Rejime Identifikasaun Rejistu Sirkulasaun Animál no Dekretu-lei númeru 7/2003 sobre Kódigu Estrada.
Notísia relevante: MAE sensibiliza dekretu-lei lima ba autoridade Covalima
Jornalista: Celestina Teles
Editora: Maria Auxiliadora
