EDUKASAUN, HEADLINE

MESSK tinan ne’e sei atribui tan bolsa estudu ba timoroan nain-31

MESSK tinan ne’e sei atribui tan bolsa estudu ba timoroan nain-31

Ministru Edukasaun Superiór Siénsia i Kultura, José Honório da Costa Pereira Geronimo. Imajen Tatoli/Francisco Sony

DILI, 21 maiu 2024 (TATOLI)–Ministériu Ensinu Superiór Siénsia no Kultura (MESSK) tinan ne’e sei atribui bolsa estudu ba timoroan na’in-31 atu hala’o estudu iha Malázia.

“Ami sei loke prosesu iha semana rua mai atubele hetan kandidatu sira-ne’ebé iha kompeténsia atu kontinua eskola iha Malázia, nune’e semana oin Fundu Dezenvolvimentu Kapitál Umanu (FDCH, sigla portugés) loke ona avizu ba kandidata sira-ne’ebé hakarak atu kompete iha bolsu estudu referidu,” Ministru Ensinu Superiór Siénsia no Kultura, José Honório da Costa Pereira Gerónimo, informa iha salaun MESSK, Colmera, tersa ne’e.

Nune’e, MESSK husu ba FDCH atu fó teste ba kandidatu sira ho rigór nune’e bele fó oportunidade ba timoroan hotu hodi kompete.

“Ha’u dehan ona ba FDCH tenke halo teste ho rigór no fó oportunidade ba timoroan hotu ne’ebé iha abilidade, kapasidade no koñesimentu di’ak atu partisipa iha selesaun ida-ne’e, nune’e kandidatu sira bele liu hodi kontinua sira-nia eskola iha Málazia,” nia akresenta.

Notísia relevante : Universidade 23 iha Indonézia oferese bolsa estudu ba timor-oan 200

Antes ne’e, MESSK hamutuk ho Embaixadóra Timor-Leste iha Malázia, Joana Amaral, hala’o enkontru ona ho Prezidente Universidade Limkokwing, Dato Tiffanee Marie Lim, hodi ko’alia kona-ba bolsu estudu parsiál ba timoroan sira-ne’ebé hakarak atu kontinua sira-nia estudu iha Universidade Limkokwing.

“Iha ami-nia enkontru ne’e, Prezidente Dato Tiffanee informa kona-ba kursu sira-ne’ebé Universidade Limkokwing oferese no hato’o katak nia universidade mós sei oferese bolsu estudu parsiál ba timor-oan sira-ne’ebé hakarak atu mai kontinua estudu. Nune’e, ita agradese ba sira-ne’ebé  hakarak tulun Timor-Leste iha kapasitasaun rekursu umanu iha área xave sira,” nia tenik.

Nune’e mós, MESSK hala’o enkontru ho diretór sira husi Internasional Transnational Education Association (ITEA) Malázia, ne’ebé nu’udar organizasaun ida-ne’ebé dedikadu atu promove no dezenvolve kooperasaun entre instituisaun no individu sira-ne’ebé envolve iha edukasaun transnasionál.

Iha momentu ne’ebá, Jestór Rejiaun Áfrika-Europa, Goodwin Silver, mós  halo aprezentasaun kona-ba knaar, atividade no apoiu ne’ebé halo ona iha nasaun sira seluk hodi hasa’e kualidade edukasaun no rekursu umanu sira liuhusi dezenvolvimentu kurríkulu ba instituisaun edukasaun nian, kapasitasaun no apoiu sira seluk ne’ebé nasaun ida presiza.

“Iha enkontru ida-ne’e, ita agradese ba ITEA ne’ebé hakarak mós atu fó apoiu ba Timor-Leste iha área ensinu superiór nian, liu-liu iha parte kurríkulu nomós kapasitasaun rekursu umanu,” nia dehan..

Jornalista     : Osória Marques

Editora          : Julia Chatarina

iklan
iklan

Leave a Reply

iklan
error: Content is protected !!