EKONOMIA, HEADLINE

Ministériu Públiku entrega filafali ró unidade 22 ba MAPPF

Ministériu Públiku entrega filafali ró unidade 22 ba MAPPF

Bero Fiberglass. Imajen Tatoli/Francisco Sony

DILI, 21 Maiu 2024 (TATOLI) – Ró unidade 22 husi Ministériu Agrikultura, Pekuária, Peska no Floresta (MAPPF) ne’ebé Ministériu Públiku (MP) halo apreensaun, entrega fali ona ba MAPPF hodi disponibiliza ba grupu peskadór sira atu hala’o atividade iha tasi.

Ró sira ne’e, entrega iha semana kotuk, no daudaun asegura hela iha armazein ministériu nian no, tuir planu, iha tempu besik sei halo distribuisaun ba grupu peskadór sira iha munisípiu Bobonaro, Lautém no Liquiçá, inklui Rejiaun Administrativa Espesiál Oé-Cusse Ambeno (RAEOA).

Diretór-Jerál Peska, Akikultura no Jestaun Rekursu Akuátiku, Celestino da Cunha Barreto, haktuir katak prosesu liberta ró unidade 22 husi MAPPF ne’e, tanba serbisu hamutuk entre ministériu no empreza Cheramor Unipesoal, Lda no advogadu empreza nian maka konsege liberta ró sira ne’e.

“Ró 22 ne’ebé Ministériu Públiku liberta ona ne’e, tanba antes ne’e iha problema uitoan maka ró sira ne’e hetan apreensaun”, Celestino Barreto dehan ba Tatoli, iha Comoro, ohin.

Diretór ne’e esplika katak ró sira ne’e apreende tiha, tanba empreza Cheramor Unipesoal, Lda ne’ebé mana konkursu públiku hatama ró ba MAPPF ne’e kontra lei balun ne’ebé, tuir parte justisa, katak la fó benefísiu ba peskadór sira, Ministériu Públiku foti tiha hodi submete ba prosesu justisa. “Maibé depois liu husi dalan justisa, Ministériu Públiku hetan filafali esplikasaun katak ró sira ne’e MAPPF nian ne’ebé atu apoia ba peskadór sira, entaun iha semana kotuk MP entrega filafali ba MAPPF”.

MAPPF liuhusi Diresaun Peska sei fó uluk ró sira ne’e ba peskadór sira ne’ebé presiza duni iha tinan ida ne’e no iha tinan oin maka sei fó tan apoia ba grupu sira seluk, nune’e bele tulun sira atu kontribui ba hasa’e produsaun ikan no aumenta konsumu iha rai laran tuir meta ne’ebé iha.

Tuir dadus husi Ministériu Agrikultura, ró hamutuk unidade 110 maka sosa ona, maibé iha 88 maka nia prosesu la’o ho di’ak hodi distribui ona ba peskadór sira no agora aumenta tan ho ró 22 ne’ebé foin devolve ne’e kompleta ona númeru ne’ebé iha.

Notísia relevante: Peskadór iha munisípiu rua no RAEOA sei simu ró 15

Jornalista: Tomé Amado

Editora: Maria Auxiliadora

iklan
iklan

Leave a Reply

iklan
error: Content is protected !!