POLÍTIKA

PN aprova alterasaun Estatutu Kombatente Libertasaun Nasionál iha finál globál

PN aprova alterasaun Estatutu Kombatente Libertasaun Nasionál iha finál globál

Parlamentu Nasionál (PN) liuhusi reuniaun plenária aprova proposta-lei númeru 7/VI(1a)-alterasaun datoluk Lei Estatutu Kombatente Libertasaun Nasionál iha finál globál ho votu a-favór 54, kontra 0 no abstensaun rua (2), tersa (21 maiu 2024). Imajen Tatoli/António Goçalves “Daciparu”.

DILI, 21 maiu 2024 (TATOLI)—Parlamentu Nasionál (PN), tersa ne’e, liuhusi reuniaun plenária aprova proposta-lei númeru 7/VI(1a)-alterasaun datoluk Lei Estatutu Kombatente Libertasaun Nasionál iha finál globál ho votu a-favór 54, kontra 0 no abstensaun rua (2).

Notísia Relevante: PN aprova pedidu urjénsia ba alterasaun Estatutu Kombatente Libertasaun Nasionál

“Ne’ebé, lei ne’e pasa,” Prezidente Parlamentu Nasionál, Maria Fernanda Lay, fó sai iha sala plenária Parlamentu Nasionál.

Antes aprovasaun finál globál, Deputadu sira diskute no aprova uluk pedidu rekerimentu re-abertura diskusaun ba proposta rua iha espesialidade plenária PN.

Proposta dahuluk mak proposta ba alterasaun artigu 25 kona-ba pensaun espesiál subsisténsia no artigu 27 kona-ba pensaun sobrevivénsia ho objetivu altera ho ninia redasaun orijinál hodi mantein iha Estatutu Kombatente Libertasaun Nasionál ne’ebé aprezenta husi Deputadu PLP, Helder Freitas.

Liuhusi deklarasaun votu, Xefe Bankada FRETILIN, Aniceto Longuinhos Guterres Lopes,  hateten Estadu TL manifesta vontade povu nian ne’ebé halibur iha asembleia konstituente  asume responbilidade hodi fó rekoñesimentu no valorizasaun ba funu-na’in sira iha luta ba indepedénsia nasionál no asume mós hodi fó protesaun sosiál ba sira-ne’ebé partisipa iha luta ida-ne’e, liuliu sira-ne’ebé inkapasitadu tanba funu no ba independente sira hosi hirak ne’ebé fó sira-nia vida ba libertasaun pátria.

Valorizasaun rejisténsia garante iha konstituisaun artigu 11 no konstitui obrigasaun Estadu hodi rekoñese timoroan sira-ne’ebé brani hamriik ba defeza Estadu proklamadu iha 28 novembru 1975, tanba ne’e iha primeira lejislatura hetan konsensu entre órgaun soberania sira hodi avansa ho lei atu rekoñese, valoriza no proteje kombatente.

Inisiativa lei ida-ne’e hahú iha tinan 2003 liuhusi prosesu peskiza no konsulta ida naruk ho kuadru rezisténsia nian hodi halibur hanoin konverte lei númeru 3/2006, 12 abríl, kona-ba Estatutu Kombatente Libertasaun Nasionál ne’ebé trata loos de’it ba titulár kombatente, kombatente fundadór, kombatente veteranu no kombatente martir.

Aniceto hateten, FRETILIN vota a-favór ba alterasaun lei ne’e tanba FRETILIN nia responsabilidade no FRETILIN iha mak luta naruk no FRETILIN iha mak iha veteranu, kombatente no faluk ho oan ki’ak, martir no fundadór nasaun.

Xefe Bankada CNRT, Duarte Nunes, lori bankada deklara hodi fó votu a-favór ba alterasaun lei, tanba fiar Governu Konstitusionál da-sia liuhusi Ministériu ba asuntu Kombatente Libertasaun Nasionál (MAKLN) durante tempu naruk hodi haree problema no difikuldade ne’ebé mosu dezde hahú implementa to’o agora no Governu haree iha duni nesesidade atu halo mudansa.

“No, mudansa ne’e la’ós ba interrese ba Governu nian maibé ba interrese Estadu no povu nian. Ami fiar, bainhira implementa sei hadi’a veteranu sira-nia moris no Estadu nia estabilidade,” nia dehan.

Ministru MAKLN, Gil da Costa “Oan Soru”, hateten Governu komprometidu ba buat ne’ebé sai obstákulu, la signifika Governu nian de’it maibé ema hotu nian, no parte MAKLN sei mai hato’o ba asuntu veteranu no prontu nafatin simu saida mak mai husi PN ho bankada hotu-hotu ninia opiniaun liuliu ida-ne’ebé konstrutivu.

Ho aprovasaun alterasaun lei ne’e, meza PN haruka ba komisaun F atu halo redasaun finál hafoin envia ba Prezidente Repúblika mak iha kompeténsia atu promulga.

Enkuantu, iha 15 maiu liu-bá, Komisaun F trata asuntu Saúde, Seguransa Sosiál no Igualidade Jéneru iha PN, halo apresiasaun no aprovasaun relatóriu diskusaun no votasaun espesialidade ba proposta-lei númeru 7/VI(1a)-alterasaun datoluk Lei Estatutu Kombatente Libertasaun Nasionál.

Relatóriu ne’e mai husi diskusaun faze espesialidade ne’ebé mak realiza loron tolu iha semana kotuk iha munisípiu Liquiça.

Durante diskusaun iha espesialidade Deputadu sira iha komisaun aprezenta proposta hamutuk 22 mak pasa, ne’e ko’alia kona-ba ninia objetu husi proposta-lei liuliu ba iha situasaun ida-ne’e mak ko’alia kona-ba patriota libertasaun nasionál ne’ebé konsidera mós vítima ba tempu pasadu ninian.

Iha  artigu kona-ba prestasaun sobrevivente no mós ho prestasaun pekunária úniku ne’ebé mak ko’alia subsídiu ba iha veteranu sira-ne’ebé mak halakon tiha uma lisan, maibé se bainhira nia feen no oan simu kuandu laiha ona entaun la presiza ba iha uma lisan, maibé fila-fali ba kofre Estadu.

Antes ne’e, iha 29 abríl, PN liuhusi reuniaun plenária aprova  proposta-lei númeru 7/VI(1a) , alterasaun datoluk lei númeru 3/2006, 12 abríl, kona-ba Estatutu Kombatente ba Libertasaun Nasionál iha faze jeneralidade ho votu a-favór 39, kontra zero no abstensaun 19.

Iha diskusaun jeneralidade, Ministru MAKLN, Gil da Costa Monteiro “Oan Soro” ne’ebé aprezenta proposta-lei númeru 7/VI(1a), alterasaun datoluk lei númeru 3/2006, 12 abríl, kona-ba Estatutu Kombatente ba Libertasaun Nasionál, hakarak altera artigu hamutuk 15 iha lei vijente.

“Iha loron 25-26 janeiru 2024, ministériu halo ona konsultasaun aberta ho estrutura KKLN nasionál no munisipál nu’udar órgaun úniku reprezentante husi kombatente, nune’e  ministériu submete no aprezenta proposta alterasaun ba artigu sira hanesan artigu 3, 10, 11, 12, 13, 15, 18, 27, 28, 35 no revoga artigu 17 Komisaun Omenajén. Nune’e, reajusta husi artigu 8, 15, 18, 31, 32 no ikus liu hasai letra eis iha artigu 38 husi Estatutu Kombatente hodi hetan apresiasaun husi Konsellu Ministru antes lori mai uma-fukun Parlamentu Nasionál,” nia hateten

Nu’udar baze ba implementasaun, tanba ne’e hahú iha tinan 2006 MKLN komesa halo ona validasaun ba kombatente no mártir hamutuk rihun 7668 tuir grau ida-idak, no husi númeru ne’e, hamutuk ema benefisiáriu ba pensaun kombatente no mártir hamutuk 28.281.

Iha mandate Governu Konstitusionál da-sia ba tinan 2023 nia rohan, finaliza verifikasaun dadus tinan 2009 ne’ebé ho nia totál rejistu 124.680 rekerente, no hein validasaun finál sei rezolve mós dadus pendente no reklamasaun husi primeriu rejistu hamutuk rihun 10.391, no iha periódu mandatu ida-ne’e sei kontinua halo abertura rejistu datoluk hodi konklui.

Maibé, nia dehan, iha períodu ida-ne’e mós mosu lamentasaun barak husi komunidade kona-ba dadus veteranu, tanba ne’e iha mandatu Governu da-sia identifika problema barak kona-ba falsifikasaun dadus, prizaun, sertidaun óbitu no seluk tan, rekuiñesimentu baze apoiu estatutu kombatente sira-ne’ebé mate iha ai-laran no iha vila, diskriminasaun ba determinasaun husi estrutura diretiva sira kona-ba dedikasaun ou eskluzividade, la rekoñese estudante no eis funsionáriu sira-ne’ebé uluk kontribui mós ba luta maibé balun simu hela pensaun.

Família sira husi kombatente falesidu sira ezije rejistu no asesu pensaun no problema ekonómia sira seluk. Aleinde ne’e, inan-feton sira-ne’ebé uluk hetan violasaun tanba hakarak defende interrese ukun-aan ikus mai sosiedade ida-ne’e prega liafuan ba sira hanesan vítima no esplora ba nia istória no hodi sai ba konsumu públiku. Ida-ne’e, nu’udar Estadu la permite, tanba halo intimidasaun ba ema-nia psikolójia no nia dignidade, ikus família sira sente moe no hirus.

Nune’e, ho hanoin katak lei tenke fó fatin ba sira hodi dignifika sira-nia terus nu’udar kontribuisaun ba luta no hodi bele permite armónia sosiál no estabilidade polítika nasionál.

Proposta alterasaun ne’e kumpre ba kompromisu programa Governu da-sia hodi rezolve preokupasaun sira husi kombatente no família martir libertasaun nasionál ho objetivu atu rekuiñese estudante no eis funsionáriu sira-nia kontribuisaun.

Iha proposta ne’e, atu valoriza inan-feton sira-nia sofrimentu ho estatutu nu’udar patriota libertasaun nasionál, kontrola rekomendasaun ba dedikasaun eskluziva tenke bazeia ba partisipasaun la’ós ona ho determinasaun husi estrutura sira.

“Liuliu hirak ne’ebé mate mate iha baze apoiu no durante rezisténsia hodi define sira-ne’ebé mate, tanba inimígu fó dalan ba família husi kombatente falesidu hodi rejistu determina direitu ba pensaun sobrevivénsia, rekoñese baze apoiu ba direitu prestasaun pekunária únika  3-7, atribui pensaun pekunária únika ba família kombatente felesidu ne’ebé la konsege simu sira-nia direitu,” nia dehan.

Nia hateten, proteje investimentu fundu veteranu ne’ebé dezenvolve husi Konsellu Kombatente Libertasaun Nasionál (KKLN) nu’udar kontribuisaun ba prosesu dezenvolvimentu sustentável tuir prinsípiu libertasaun ba povu.

Enkuantu, tuir testu orijinál iha Proposta-lei númeru 7/VI(1a), alterasaun datoluk lei númeru 3/2006, 12 abríl, kona-ba Estatutu Kombatente ba Libertasaun Nasionál atu altera artigu 3, 8, 10, 11, 12, 13, 15, 18, 27, 28, 31, 32, 35 no 38.

Notísia Relevante: Komisaun F aprova relatóriu diskusaun espesialidade ba alterasaun Estatutu Kombatente Libertasaun

Jornalista : Nelson de Sousa

Editór       : Cancio Ximenes

iklan
iklan

Leave a Reply

iklan
error: Content is protected !!