Servisu Edukasaun Viqueque koloka profesór 41 ba eskola 16  

VIQUEQUE, 21 maiu 2024 (TATOLI)- Servisu Edukasaun Munisípiu Viqueque, tersa ne’e, koloka profesór sira-ne’ebé liu bolsa kandidatu na’in-41, ba eskola   Ensinu Báziku Centrál (EBC, portugés) no Ensinu Báziku Filiál (EBF) hamutuk 16 iha munisípiu Viqueque.

Iha serimónia kolokasaun profesór sira-ne’e, Sekretáriu Asuntu Sosiál no Organizasaun Munisipál, Acacio de Sousa, dehan Governu liuhusi Ministériu husu profesór kolokada mai munisípiu Viqueque sira atu ba hanorin estudante sira  ho di’ak no tenke hatudu disiplina iha komunidade sira-nia leet inklui hadudu karakter edukadór.

“Profesór sira-ne’e maioria koloka ba iha área remota ne’ebé nu’udar edukadór prontu simu, prontu ba hanorin hodi serbí ita-nia oan sira, serbí ba ita-nia komunidade ida-ne’e maka moto edukadór.  Ha’u mós husu agradese ba profesór sira-ne’ebé koloka ona mai munisípiu Viqueque hodi reforsa prosesu apredijazen,”dehan Sekretáriu Munisipâl ne’e.

Nia enkoraja profesór na’in-41 ne’ebé liu iha rekrutamentu profesór tenke hanorin ho kualidade ba estudante sira atu estudante sira bele komprende matéria sira liuliu sai matenek tanba sira mak futuru nasaun nian.

“Tenke koopera no kolabora ho profesór tuan sira hodi  hanorin estudante sira  tenke bazeia ba mata-dalan kurríkulun sira-ne’ebé ME establese ona”, nia hato’o.

Iha fatin hanesan,  Servisu Edukasaun Munisípiu Viqueque, Júlio Sakadura, dehan profesór sira-ne’e balun mai husi Bobonaro, Lautém no Baucau ne’ebé koloka mai munisípiu Viqueque hodi hanorin estudante sira. Maske númeru profesor ki’ik, maibé ba oin ME sei halo rekrutamentu hodi koloka ba eskola sira-ne’ebé sei menús profesór.

“Profesór sira-ne’e koloka ba postu lima mak hanesan Lacluta, Ossu, Uatulari, Viqueque Vila no Uatucarbau sira ba liu iha área rurál, maibé ida-ne’e sai hanesan misaun ba profesór hodi eduka estudante sira”, Júlio akresenta.

Tuir dadús kolokasaun profesór ba EBF 1,2,3 Uma-Tolu ho profesór na’in-2, EBF 1,2,3 Laline na’in-5,  EBF 1,2,3 Liaruka na’in-2, EBF 1,2,3  Uagia na’in-4, EBF 1,2,3 Uabubu na’in-3, EBF 1,2,3  Osolari na’in-2,  EBF 1,2,3  Nunululi na’in-4. EBF 1,2,3   Bibileo na’in-3, EBF 1,2,3  Uma Uain Leten na’in-2,  EBF 1,2,3  Aimanas Rai na’in-2, EBF 1,2,  Comu-Oli na’in-2, EBF 1 Butao, EBC 1,2,3 08 Umu Sege Uatulari na’in-3, EBF 1,2,3 Nahae  na’in-3,  EBF 1,2 Tahagaba  na’in-1, EBF 1,2,3  Tula-Oli na’in-2.

Entretantu, serimónia kolokasaun  profesór sira-ne’e hetan partisipa husi autoridade munisípiu Viqueque, superintendente servisu edukasaun, funsionársiu servisu edukasuan Viqueque no profesór  kolokasaun na’in-41 kompostu husi mane na’in-23 no feto na’in-18.

Notísia relevante:EBC Haenaudere enfrenta problema menus profesór

Jornalista  : Vitorino Lopes da Costa

Editór      : Florencio Miranda Ximenes