DILI, 22 maiu 2024 (TATOLI)- Governu liuhusi reuniaun Konsellu Ministru, kuarta ne’e, aprova donativu millaun $4 hodi apoia ba vitima inundasaun iha Brazíl foin lalais ne’e.
“Rezolusaun Governu ne’e aprezenta husi Vise-Primeiru-Ministru, Ministru Koordenadór Asuntu Ekonómiku no Ministru Turizmu Ambiente, Francisco Kalbuadi Lay, reprezenta Primeiru-Ministru, relasiona ho konsesaun donativu ida ba Repúblika Federativa Brazíl, hodi apoia intervensaun tanba inundasaun ne’ebé destroi Estadu Rio Grande Súl ho valór millaun $4,” katak iha nota ne’ebé Agência TATOLI asesu husi media Gabinete Primeiru-Ministru.
Governu manifesta ninia solidariedade no fraternidade ho povu maun-alin brazileiru no liuliu ho populasaun Estadu Rio Grande Súl, ne’ebé akontese udan boot hodi hamosu inundasaun no rai monu, ne’ebé kauza ema 157 mate, kanek 800 no besik 80 maka lakon, no mós ema rihun 77resin evakua ba fatin temporáriu.
Haree ba situasaun ne’ebé grave no louva kompromisu konstitusionál Repúblika Demokrátika Timor-Leste, Governu aprova apoiu ida-ne’e, hodi kontribui ba esforsu autoridade brazileira ba kriasaun kondisaun sobrevivénsia ba populasaun afetada no rekonstrusaun ba rejiaun ne’ebé hetan estragu.
Notísia relevante:Governu aprova donativu $60.000 ba reprezentasaun Arabe Saharaui iha TL
Jornalista: Hortencio Sanchez
Editór: Florencio Miranda Ximenes
