COVALIMA, 22 Maiu 2024 ( TATOLI)–Membru Polisia Nasionál Timor-Leste, munisípiu Covalima hamutuk ema 29, iha loron 11 fulan-maiu 2024 ne’e entrega ona atributu arte-marsiál no rituál ba Komando Polisia munisípiu Ainaro.
“Bazeia ba orientasaun ne’ebé ita simu husi komandu jerál serimónia ofisiál membru PNTL husi munisípiu Aileu, Ainaro no Covalima entrega atributu arte marsiál no arte rituál konsentra iha munisípiu Ainaro,” Komandante PNTL Covalima, Superintendente Polísia, Calisto Gonzaga hateten ba jornalista, iha Santa-Rosa, ohin.
Notísia Relevante :Semana oin, PNTL Bobonaro Aprezenta Atributu Arte Marsiál ba MP
To’o oras ne’e, Komandu PNTL Covalima, rejista membru PNTL hamutuk na’in-33 maka koopera hodi entrega atirbutu hirak ne’e, maibé membru na’in ida antes ne’e, entrega ona ba iha munisípiu Liquiça, no na’in tolu seluk hosi servisu migrasaun.
“Ita-nia membru PNTL iha Covalima entrega hotu ona atributu organizasaun arte marsiál no rituál ba Komandu Jerál maibé tuir despaixu husi MI hanesan komandante nafatin informa ba membru ne’ebé seidauk rejistu bele rejistu,”nia hateten.
Calisto esplika atributu arte marsiál no rituál ne’ebé maka ninia membru sira entrega ona mak hanesan kalsa, kamiza, sintu ne’ebé ligasaun ho grupu arte-marsiál no rituál.
Entertantu, hosi totál membru PNTL na’in-29 maihosi Organizasaun arte marsiál Persaudaraan Setia Hati Terate (PSHT-sigla Indonézia ) 16, Ikatan Kerasakti (IKS) na’in-hitu, Kmanek Oan Rai Klaran (KORK) na’in-lima no Arte riturál na’in-haat.
Jornalista: Celestina Teles
Editór: Agapito dos Santos
