DILI, 22 maiu 2024 (TATOLI)—Minisípiu Dili notifika ona na’in ba restaurante Cossete – Tea&Bistro, Eufrasia Vieira, iha Pantai Kelapa, hodi hamamuk fatin iha tempu badak.
“Ha’u rasik horiseik lori notifikasaun ba entrega ona na’in ba Cossete – tea & bistro Eufrasia Vieira atu hamamuk fatin tanba okupa espasu públiku, notifikasaun ne’e válidu durante loron-neen, sura husi simu notifikasaun ne’e na’in tenke hamamuk, se lae ekipa mak sei tun sobu,” Diretór Servisu Munisipál Jestaun Merkadu no Turizmu Munisípiu Dili, Arthur Henriques, informa ba Agência Tatoli, iha antigu Merkadu Becora, kuarta ne’e.
Razaun munisípiu Dili fó notifikasaun ba restaurante ne’ebé foin loke ba públiku iha fulan-haat liubá tanba nota katak edifísiu okupa liu espasu públiku no halo edifísiu iha valeta leten.
“Ita haree nia halo Cossete ne’e liu tiha morru ne’ebé iha mai liu estrada, okupa espasu públiku, liu-liu ninia baranda ne’e halo loos iha valeta leten, ne’ebé ita fó ona notifikasaun, hein na’in bele koopera hamamuk fatin,” nia akresenta.
Notísia relevante : Ekipa SEATOU sobu barraka 78 iha antigu merkadu Becora oin
Relasiona ho asuntu ne’e, Jornalista Agência Tatoli tenta atu halo entrevista ho na’in ba Cossete, Eufrasia Vieira, maibé la konsege ho razaun okupadu ho serbisu no laiha fatin.
“Ami-nia xefe okupadu ohin la tama serbisu, relasiona notifikasaun ne’e karik ami-nia xefe rona no hatene ona maibé ami hanesan traballadór ami seidauk rona no kontinua serbisu,” Jerente Cossete – Tea&Bistro, Arnaldo da Conseição, hateten.
Serbisu hotu ne’ebé Munisípiu Dili halo bazeia ba oriantasaun Ministériu Administrasaun Estatál (MAE) hamutuk ho Sekretaria Estadu Asuntu Toponímia no Organizasaun Urbana (SEATOU) liuhusi sirkulár ho númeru referénsia SEATOU-MAE/II/2024, ne’ebé hanesan programa IX Governu Konstitusionál kona-ba Desentralizasaun, artigu 7 dekretu-lei númeru 49/2023, 23 agostu Orgánika Ministériu Administrasaun Estatál, dekretu-lei númeru 3/2024 17 janeiru, nomós alterasaun dahuluk dekretu-lei númeru 33/2008 27 agostu, orden servisu hosi Ministru Administrasaun Estatál liuhosi karta númeru 61/M-MAE/IX/2023 kona-ba kompeténsia SEATOU.
Bazeia ba dekretu-lei númeru 3/2024 17 janeiru, nomós alterasaun dahuluk ba dekretu-lei númeru 33/2008 27 agostu husi artigu 1 ko’alia kona-ba natureza, artigu 3 kona-ba infrasaun kontra ordenasaun sira ne’ebé sei hetan sansaun ka multa, artigu 5, alenia a, h ne’ebé ko’alia kona-ba proibisaun sira.
Artigu 6, pontu 1,2,3 no artigu 5 kona-ba organizasaun ijiene orden públika, artigu 9, ko’alia kona-ba prosedimentu kontra ordenasaun, artigu 12 fó kompeténsia ba Prezidente Autoridade Munisipál sira atu kontrola bazeia ba anexu I kona-ba valór koima kontra ordenasaun tuir artigu 5.º, númeru. 1, alínea a) h) husi $5 to’o $500 no $10 to’o $1.000, artigu 6. númeru 1, 2 alinea a) g) a) a h nomós artigu 8, númeru 1.
Proibisaun sira mak hanesan labele husik animál hanesan karau, bibi, fahi no manu la’o livre iha estrada públika tanba bainhira pertuba asidente ba motór no karreta, na’in ba animál sei toma responsabilidade.
Aleinde ne’e, bandu labele halo negósiu fa’an sasán taka dalan públiku, labele taka bee dalan ka valeta, labele hala’o konstrusaun iha área protejida, no konstrusaun ilegál sira seluk.
Jornalista : Arminda Fonseca
Editora : Julia Chatarina
