DILI, 22 maiu 2024 (TATOLI)—Ekipa konjunta ne’ebé lidera husi Sekretaria Estadu Asuntu Toponímia no Organizasaun Urbana (SEATOU), kuarta ne’e, sobu barraka hamutuk 78 ne’ebé okupa espasu públiku iha antigu merkadu Becora oin.
Ekipa konjunta ne’e kompostu husi SEATOU, Autoridade Protesaun Sivíl, Ministériu Obra Públika (MOP), Ministériu Solidaridade Sosiál no Inkluzaun (MSSI), Polísia Nasionál Timor-Leste (PNTL) no FALINTIL-Forsa Defeza Timor-Leste (F-FDTL) no seluk tan.
Sekretáriu Estadu Asuntu Toponímia no Organizasaun Urbana, Germano Santa Brites Dias, hateten, atividade ne’e nu’udar atividade rutina.
“Ohin ita hasai ita-nia vendedór sira-ne’ebé okupa espasu públiku. Ita hasai sira no haruka Ministériu Obra Públika lori rai-henek mai aterru iha antigu merkadu laran hodi muda hotu vendedór sira-ne’ebé halo negósiu iha oin ne’e mai fa’an hotu iha laran atu MOP bele hadi’a estrada iha oin, tama to’o mai antigu merkadu laran bele livre,” Sekretáriu Estadu inform merkadu Becora, Dili.
Notísia relevante : Ekipa SEATOU hamoos bee-dalan iha área Caicoli
Objetivu MOP aterru uluk rai-henek hodi iha futuru mai bainhira atu hadi’a merkadu ne’e la presiza tula tanba rai-henek atu aterru tetuk ona.
Aleinde ne’e, ekipa konjunta mós hasai karreta a’at sira-ne’ebé para iha antigu merkadu laran hodi tula sai hotu bá Tibar.
“Ita sobu iha oin ne’e hamutuk 78 maibé konta abitante ne’ebé balun hela iha antigu merkadu laran ne’e hamutuk 300-resin. Dadus sira ne’e ita foti hotu ona nune’e iha futuru bainhira obra merkadu la’o ona sei fó notifikasaun ba sira,” nia akresenta.
Iha biban ne’e, Sekretáriu Estadu husu ba abitante ne’ebé okupa espasu iha antigu merkadu laran, ho konsiénsia hamamuk fatin tanba bainhira MOP aterru hotu no rai kaber sei fó notifikasaun hodi hamamuk fatin.
“Ha’u hanoin diálogu ba fatin ne’e sei la halo tanba loron-loron jestaun merkadu mai fó avizu no ha’u mós mai hela de’it, ne’ebé sira hatene hela informasaun la presiza halo diálogu, hanoin sira husu diálogu ne’e tanba haree husi Tasi-tolu nian, maibé ha’u atu hateten de’it katak Tasi-tolu halo diálogu tanba momentu ne’ebá komunidade barak mak la rona informasaun,” governante ne’e klarifika.
Tuir planu atividade SEATOU ba aban nian sei kontinua sobu barraka sira hahú husi Becusse Kraik to’o Becusse Sentru.
“Ita husu Komandante Ofisiál Polísia Suku (OPS), Administradór postu, no Xefe suku organiza populasaun husi Becusse Kraik to’o Becusse Sentru hodi ko’alia ho sira atubele oferese sira-nia rai metru rua ka haat ba estrada liman loos no liman karuk atu karreta bele tama to’o rate Becusse,” nia tenik.
Husu halo diálogu
Iha fatin hanesan, Koordenadór Komunidade antigu merkadu Becora, Adelino Mascarinas, hateten, sira-nia parte koopera ho Governu bainhira atu hasai komunidade ne’ebé okupa iha antigu merkadu Becora laran, maibé Governu tenke konsidera sira hodi halo uluk diálogu mak hasai nune’e trata povu ho dignu.
“Tanba liuhusi diálogu mak sai xave importante hodi rezolve povu nia problema maibé laiha diálogu signifika Governu laiha morál ba povu ida-ne’e,” nia salienta.
Afetadu despeju administrativu, Ermelinda da Silva, sente triste tanba ekipa jestaun merkadu mai avizu, verifika no tau ona nomór maibé seidauk fó notifikasaun no diálogu hodi hamamuk fatin.
“Sira haruka ami ida-idak sobu ami-nia fatin no planu haruka ami ba fa’an fali iha merkadu laran maibé ita hotu hatene merkadu ne’e husik vendedór de’it mak fa’an sasán iha laran karik di’ak, agora ema hela iha laran ne’e hanoin ladun di’ak maibé povu kiik halo tuir de’it saida mak Governu haruka,” nia lamenta.
Negosiante ne’e konta tuir, barraka ne’ebé nia hela no halo negósiu la’ós foin mak halo maibé desde tempu Indonézia.
“To’o agora loron-loron fa’an etu iha estrada ibun hodi buka osan sustenta ona moris no eskola. Maibé ohin ami sobu ona provizóriu ha’u bá hela ho família, hein merkadu laran aterru hotu ona mak ha’u mai fa’an fali,” nia dehan.
Jornalista : Arminda Fonseca
Editora : Julia Chatarina
