POLÍTIKA

Ohin, PN adia debate ho Ministra Saúde

Ohin, PN adia debate ho Ministra Saúde

Prezidente Parlamentu Nasional, Maria Fernanda Lay. Imajen Tatoli/Francisco Sony

DILI, 22 maiu 2024 (TATOLI)— Parlamentu Nasionál (PN), kuarta ne’e, tuir planu atu realiza plenária extraordináriu hodi hala’o debate ho Ministra Saúde (MS), Elia dos Reis Amaral, maibé labele realiza no adia fali ba semana oin.

Notísia Relevante: PN sei hala’o debate ho Ministra Saúde iha 22 maiu

“Ha’u iha informasaun ida, ha’u konfirma ona ho Governu katak ba debate extraordináriu, tanba atividade barak no Primeiru-Ministru seidauk hatun despaixu hodi autoriza Ministra Saúde atu mai debate ho ita iha plenária ida-ne’e. Ho nune’e, ha’u espera katak proxima semana, ita bele marka fali tempu, tanba serbisu barak,” Prezidente Parlamentu Nasional, Maria Fernanda Lay, hateten iha uma-fukun Parlamentu Nasionál.

Enkuantu, iha 16 maiu 2024, liuhusi reuniaun líder bankada tau ona ajenda reuniaun plenária extaordinária iha 22 maiu tinan ne’e sei hala’o debate ho Ministra Saúde (MS),.

“Iha kuarta-feira semana oin, iha plenária extaordinária ho Ministra Saúde kona-ba asuntu saúde jerál ne’ebé akontese iha ita-nia rain,” Sekretária meza Parlamentu Nasionál (PN), Virgínia Ana Belo hateten ba jornalsita sira hafoin enkontru reuniaun líder bankada iha sala komferénsia Parlamentu.

Nia hatutan, debate ne’e sei ko’alia inklui ho problema ai-moruk stock out maibé problema saúde barak tebes ne’ebé sei abranje ba asuntu sira seluk iha área saúde.

Enkuantu, tuir Konstituisaun Repúblika Demokrátika Timor-Leste (KRDTL) iha artigu 92 (Definisaun) Parlamentu Nasionál mak órgaun soberania Repúblika Timor-Leste nian ne’ebé reprezenta ema timoroan tomak, iha kbiit atu halo lei, atu fiskaliza no atu halo desizaun polítika.

Tuir rejimentu PN, bainhira deputadu sira levanta beibeik preokupasaun iha área saida de’it bele mós bolu direta membru Governu iha área tutela hodi halo debate, atu bele hatene polítika no medida saida mak buka solusiona ba preokupasaun ne’ebé iha.

Enkuantu, PN bolu Ministra Saúde hodi halo debate tanba iha reuniaun plenária iha loron segunda-tersa ne’e, Deputadu sira sempre hato’o preokupasaun iha área saúde.

Jornalista : Nelson de Sousa

Editór        : Cancio Ximenes

iklan
iklan

Leave a Reply

iklan
error: Content is protected !!